Prezident Ukrainy Uładzimir Zialenski ŭ Biełym domie sustreŭsia z prezidentam ZŠA Donaldam Trampam pierad tym, jak adpravicca na pachavańnie sienatara Lindsi Hrema, jaki byŭ blizkim paplečnikam Trampa i siabram Ukrainy, piša Ukrainskaja słužba Bi-bi-si.
Pavodle danych ukrainskaha boku, presa nie prysutničała na sustrečy prezidentaŭ, jakaja pavinna była pačacca ŭ 16:30 pa biełaruskim časie.
Vydańnie «Suśpilnie» sa spasyłkaj na karespandentku ź miesca padziej a 18‑j hadzinie paviedamiła, što sustreča Zialenskaha i Trampa ŭ Biełym domie skončyłasia. Jana praciahvałasia kala hadziny.
Zialenski ŭžo pakinuŭ Bieły dom, akurat tady, kali tudy prybyŭ premjer-ministr Izraila Bińjamin Nietańjachu. Paśla jaho sustrečy z Trampam usie try lidary vypraviacca na pachavańnie.
Tym časam amierykanskija parłamientaryi pačali prybyvać da Kapitolija, dzie adbudziecca raźvitańnie ź sienataram Hremam.
Paśla raźvitańnia Uładzimir Zialenski maje sustrecca ź sienatarami, jakija razhladajuć zakonaprajekt pra sankcyi suprać Rasii. Jak paviedamiła ambasadarka Ukrainy ŭ ZŠA Volha Stefanišyna, sienatary čakajuć hałasavańnia ŭžo siońnia.
Napiaredadni vizitu ŭ Vialikabrytaniju i ZŠA Zialenski daŭ intervju vydańniu Sky News, u jakim raskazaŭ pra toje, što płanuje abmierkavać z Trampam «abaronu pavietra» i sankcyi suprać Rasii.
Choć jon adkrytym tekstam nie skazaŭ, što mienavita dva lidary abmiarkujuć u kantekście SPA, možna vykazać zdahadku, što havorka išła pra licenzii na vytvorčaść rakiet da sistem Patriot.
«Dobraja sustreča z prezidentam Trampam u Avalnym kabiniecie. Dziakuju za ŭsio, što my robim razam dla abarony žyćciaŭ ukraincaŭ i dasiahnieńnia miru. Pierš za ŭsio vykazaŭ prezidentu Trampu našy spačuvańni ŭ suviazi sa śmierciu Lindsi Hrema. Jon byŭ sapraŭdnym siabram Ukrainy.
Abmierkavali z prezidentam licenzii na vytvorčaść pierachopnikaŭ dla kompleksaŭ Patriot, a taksama niekatoryja inšyja idei, jakija mohuć dapamahčy. Akramia taho, havaryli pra dypłamatyju — važna aktyvizavać dypłamatyčny praces. Našy kamandy ŭzhodniać detali dalejšaj kamunikacyi. Udziačny Złučanym Štatam za niaźmiennuju padtrymku», — zajaviŭ sam Zialenski paśla sustrečy.
Ciapier čytajuć
Siarhiej Cichanoŭski zapuściŭ svoj jutub-kanał ź vieršami i kazkami42
Kamientary