«U dzień na ježu tracim 30—40 BYN». Jak žyvie ŭ Biełarusi siamja z dachodam 3 000 BYN
Natalla — mama padletka. Žyvie ŭ abłasnym centry, pracuje va ŭstanovie adukacyi, zarablajučy kala 1 500 BYN. Jašče prykładna na takuju ž sumu papaŭniajuć biudžet zdača kvatery, jakaja dastałasia ŭ spadčynu, i alimienty ad byłoha muža. Razam — 3 000 BYN. Jak hetaja suma tracicca, u žančyny zapytała vydańnie Myfin.by.
«Roŭna tracina biudžetu źjadajecca ŭ litaralnym sensie»
Najbolšy artykuł vydatkaŭ — ježa.
«Ja niejak zadałasia metaj i padličyła, što ŭ dzień nam z dačkoj treba 30—40 BYN. Heta značyć u rajonie 1 000 BYN u miesiac. Atrymlivajecca, što roŭna tracina biudžetu źjadajecca ŭ litaralnym sensie. Starajusia jeści bolš-mienš karysnuju ježu, choć časam chočacca i škodnaha. Tady kuplaju sabie kaŭbasu, a dačce čypsy. Usie my ludzi. Bolš starajusia sama štości pryhatavać, čym kuplać hatovaje ŭ kulinaryi».
U chaładzilniku Natalli davoli raznastajny nabor praduktaŭ. Jana biare miasa, rybu, małočku: tvaroh zvyčajny i miakki, kiefir, hrečaski johurt. Zaŭsiody pavinna być harodnina: bałharski pierac, pamidory, ahurki i zielanina. I kabački ŭ siezon, viadoma ž.
«Kuplaju adzieńnie i ŭ kramie, i na rynku, i ŭ stokach»
Kali da ježy Natalla stavicca racyjanalna, to ŭ pytańniach adzieńnia ŭsie ekanamičnyja filtry adklučajucca. Joj padabajecca pryhoža i modna apranacca, nie moža hadami chadzić u adnym i tym ža, davodzicca pieryjadyčna kuplać adzieńnie, abutak i aksiesuary.
«Kuplaju adzieńnie i ŭ kramie, i na rynku, i ŭ stokach. Dačka, u adroźnieńnie ad mianie, da adzieńnia stavicca spakojna, addaje pieravahu spartyŭnamu stylu. Joj daj aviersajz chudzi, spartyŭnyja štany, krasoŭki — i jana ščaślivaja. U domie ja hałoŭny šopaholik. Navat ličyć nie chaču, kolki traču. Šmat. U červieni kupiła kaścium i tufli — 400 BYN. U lipieni — dźvie sukienki. Adna kaštavała kala 100 BYN na źnižcy, zatoje druhuju znajšła ŭ sekandzie za 16».
«Biarom adzin set na dvaich ci na traich»
Na pracu Natalla jeździć hramadskim transpartam.
«Kožny dzień traču hrošy na prajezd na pracu i z pracy, čaściej za ŭsio jezdžu maršrutkaj, atrymlivajecca 84—88 BYN u miesiac. Zatoje aščadžaju na abiedzie, bo biaru «ssabojki».
Vychadnyja na kanapie pierad sieryjałam Natalla pravodzić krajnie redka. Doma joj nie siadzicca. Dva-try razy na miesiac jany ź siabroŭkami ładziać «vychad u śviet»: kaviarnia, chatnija pasiadziełki, muziei, teatry ci kancerty.
«Starajusia chadzić tudy, dzie kvitki niedarahija, sprabuju tańniejšym zrabić svoj adpačynak. Kali sustrakajemsia ŭ kaviarni, u siarednim pakidaju 30 BYN. Kali, viadoma, pasiadzieć bolš hruntoŭna, to i 50 rubloŭ. Lubim siadzieć va ŭstanovach padčas «Hastrafestaŭ», tady biarom adzin set na dvaich ci na traich, atrymlivajecca vielmi biudžetna».
Na kaśmietyku 100 BYN štomiesiac
Jašče adzin artykuł vydatkaŭ — kaśmietyka. Choć Natalla i nie karystajecca ničym kaśmična darahim, ale navat najbolš nieabchodnaja baza ŭlataje ŭ kapiejčynu. U jaje kaśmietyčcy — kremy i syrovatki dla tvaru, tanalnik, pudra, tuš, ałovak dla brovaŭ, rumiany, pamady.
«Kala 100 BYN na kaśmietyku idzie kožny miesiac. To adno skončycca, to inšaje — davodzicca abnaŭlać. Lublu karejskuju kaśmietyku i našu «Bielitu». Taja sieryja, jakaja mnie padabajecca, nie biudžetnaja — kali brać usiu liniejku, to atrymlivajecca zusim nie tanna. Karejskuju kaśmietyku starajusia kuplać na źnižkach. Šmat dohladu patrabujuć vałasy: šampuń, kandycyjanier, balzamy, maski, alej, filery i termaabarona. A, jašče patrebny vitaminny kompleks ad vypadzieńnia dvojčy na hod. Raz u miesiac rablu paznohci — 50 BYN. Dačka kaśmietykaj amal nie karystajecca, ale kali kudyści vybirajecca «na vychad», to biare maju».
Natalla z dačkoj žyvuć u trochpakajovaj kvatery. Za kamunałku ŭ minułym miesiacy hierainia zapłaciła 130 BYN, jašče 50 BYN addała za elektraenierhiju, 40 BYN — za chatni internet. Na telefony idzie adnolkava: pa 35 BYN u miesiac sabie i dačce.
«Zajšła ŭ Fix Price pa myła, vyjšła z čekam na 40 BYN»
Kali skłaści ŭsie bujnyja i zrazumiełyja vydatki Natalli, to nabiahaje trochi bolš za 1 800 BYN. Pa zakonach matematyki na rukach u jaje pavinna zastavacca bolš za svabodnuju tysiaču. Ale nie zastajecca. Kudy iduć hetyja hrošy?
«Na vydatki, jakija składana zafiksavać u momancie. Dziciaci patrebnyja kišennyja hrošy, daju jašče i na kino ź picaj, školnyja patreby znoŭ ža. Abutak i kurtki na padletka kaštujuć jak na darosłaha, a mianiajucca kožny siezon. Vialikija kupli zapomnić lohka, a voś drobiazi kštałtu «zajšła ŭ Fix Price pa myła, vyjšła z čekam na 40 rubloŭ» prachodziać mima».
Siudy ž — pachod u apteku, kali zachvareli, ci spantanny padarunak siabroŭcy na dzień naradžeńnia. Hrošy prosta razychodziacca na žyćcio. Nibyta ničoha lišniaha nie kupili, a zanački jak nie było, tak i niama. Ale i ŭ daŭhi Natalla nie zalezła. Žyvie tut i ciapier.
Kudy iduć hrošy siamji z dachodam 3 000 BYN (mama i dačka)
- Pradukty: kala 1 000 BYN u miesiac;
- Kamunalnyja pasłuhi i elektryčnaść: 180 BYN u miesiac;
- Chatni internet: 40 BYN u miesiac;
- Mabilnaja suviaź dla dvuch: 70 BYN u miesiac;
- Prajezd na pracu: 84—88 BYN u miesiac;
- Kaśmietyka i dohlad: kala 100 BYN u miesiac;
- Manikiur mamie: 50 BYN u miesiac;
- Kafe, muziei, teatry i kancerty: 30—50 BYN za adzin vychad;
- Vopratka i abutak: suma mianiajecca.
Tolki pradukty, kamunalnyja pasłuhi, suviaź, internet, prajezd, kaśmietyka i manikiur abychodziacca siamji prykładna ŭ 1 525 BYN u miesiac. Pry hetym u sumu nie ŭvachodzić adzieńnie, vydatki na dzicia, leki, padarunki i šmatlikija drobnyja kupli.
Biełarusy raskazali pra siamiejny biudžet i vydatki na ipateku ŭ Polščy
«My ačmureli ad taho, nakolki heta doraha». Kolki biełarusy zaraz traciać na viasielle
«Za hod možna zarabić na kvateru ŭ Minsku». Biełaruska raskazała, jak pajechała pracavać u horad budučyni
«Časam ja žyła na 100 i na 40 rubloŭ u miesiac». Jak maci z 4 dziećmi vystajała ŭ hłuchoj biełaruskaj vioscy
Maładaja siamja z Žodzina raskazała, jak u čatyry razy skaraciła vydatki na ježu
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju84
Kamientary