«Śledčy hetamu łukašystu skazaŭ: hałoŭnaje, pryznaj vinu ŭ zdradzie dziaržavie — i adpuścim ciabie na chimiju»
Susied palitviaźnia Viačasłava Biańko raskazaŭ jaho niezvyčajnuju historyju — idejny jabaćka miesiacami davaŭ u KDB pakazańni na aryštavanaha kalehu. A paśla toj daŭ pakazańni ŭ adkaz — i aryštavali samoha Biańko.
Viačasłaŭ Biańko — adzin z małaviadomych palitviaźniaŭ. Jaho aryštavali pa «spravie radyjokłuba» — ludziej z supołki radyjoamataraŭ abvinavacili ŭ tym, što jany nibyta pierachoplivali sakretnuju infarmacyju, u pryvatnaści, prasłuchoŭvali piłotaŭ.
U «sietku», jak zajavili siłaviki, uvachodzili bolš za 50 čałaviek, ale aryštavanych siamiora. Im inkryminavali «zdradu dziaržavie». Biańko — jakraz adzin z hetych siami čałaviek.
Jaho imia prahučała ŭ prapahandysckim filmie biełaruskaha telebačańnia, ale na videa jaho nie pakazali, tolki pracytavali nibyta jaho słovy.
Paśla hetaha pravaabaroncy ŭklučyli Biańko ŭ śpis palitviaźniaŭ — abstaviny jaho pieraśledu niezrazumiełyja, ale sprava vyhladaje palityčna matyvavanaj.
Adzin z byłych aryštantaŭ raskazaŭ «Našaj Nivie», što pierasiakaŭsia ź Biańko ŭ SIZA. I heta, pa słovach našaha surazmoŭcy, byŭ adzin z samych dziŭnych jaho susiedziaŭ, dy jašče i ź niezvyčajnaj historyjaj.
«Słava — vatnik i dziki łukašyst. Kazaŭ, što jon adzin z načalnikaŭ na «Chuavei». Usio pra Kitaj raspaviadaŭ, pra toje, jaki kruty «Chuavej», — pačynaje jon.
Pavodle infarmacyi Belpol, Viačasłaŭ Biańko — minčuk. Vypusknik BDUIR. Niekalki hadoŭ pracavaŭ inžynieram-prahramistam u servisnym centry «Dyksis Plus», a ŭ 2011‑m uładkavaŭsia ŭ «Bieł Chuavej Technoładžys». Žanaty, maje dvuch dziaciej.
Biańko zrabiŭ bolš za 240 paviedamleńniaŭ pa linii 102 — skardziŭsia i na toje, što mima prajechała mašyna z parušeńniem praviłaŭ, i na toje, što cyhanka paprašajničaje kala rynku.
«Historyja Słavy takaja. Jon idejny jabaćka. Kazaŭ, što miesiacami chadziŭ u KDB jak śviedka i davaŭ pakazańni na svajho kalehu, jaki doŭha siadzieŭ u amierykancy. Słava ŭsio-ŭsio raskazvaŭ, a potym adnojčy pryjechaŭ na dopyt — a jaho paviazali samoha. Bo toj kaleha nibyta zachacieŭ jamu zrabić padlanku i nahavaryŭ na jaho ŭ adkaz», — praciahvaje jaho były susied.
Sam Biańko, naturalna, pierakonvaŭ, što ni ŭ čym nie vinavaty, ale praces užo zakruciŭsia. U vyniku jamu vystavili abvinavačvańnie ŭ «zdradzie dziaržavy».
Ad Viačasłava Biańko patrabavali pryznać vinu, što jon, naturalna, nie chacieŭ rabić, bo zdrada dziaržavie — heta ad 7 da 20 hadoŭ kałonii.
«Śledčy prapanavaŭ jamu: pryznavaj vinu i toje, što my tabie napisali, a my paśla źmienim artykuł sa zdrady dziaržavy na niejki lohki i damo tabie chimiju. Ale spačatku Słava pavinien byŭ ahavaryć siabie — pryčym dla filma prapahandystaŭ — i skazać, što jon zdradnik».
Biańko dali čas padumać, ale pačali cisnuć. Čym skončyłasia historyja, naš surazmoŭca nie viedaje. Viačasłava pieraviali ŭ pres-kamieru, kab matyvavać chutčej pryniać rašeńnie.
Miarkujučy pa tym, što videa pryznańniaŭ Biańko tak i nie pakazali pa televizary, jon nie rašyŭsia na ździełku, jakuju jamu prapanavaŭ śledčy KDB.
Nieviadoma, ci ŭžo adbyŭsia sud pa «spravie radyjokłuba», a kali tak, to jakoje pakarańnie atrymali radyjoamatary. Bolšaść palityčnych spraŭ ciapier razhladajucca ŭ zakrytym režymie.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili sotni tysiač biełarusaŭ. Niekalki socień tysiač ludziej vymušanyja byli pakinuć krainu.
«Naša Niva» — bastyjon biełaruščyny
PADTRYMAĆ
Kamientary