Leta padychodzić da kanca, i hrybny siezon-2026 užo možna papiarednie acanić. Svaim mierkavańniem sa smartpress.by padzialiŭsia viadomy biełaruski hrybnik i błohier Alaksandr Harbacevič.
— Hety hrybny siezon, kali nie samy horšy, to dakładna adzin z najhoršych za apošnija 10 hadoŭ, — padkreślivaje Alaksandr.
— Kala 5 hadoŭ tamu było vielmi suchoje leta, i pieršyja hryby pajšli ŭ pačatku žniŭnia, a sioleta vysakarodnych hryboŭ tołkam nie źjaviłasia dahetul.
Ja byvaŭ u lesie praktyčna kožny dzień z pačatku červienia. Za ŭvieś hety čas było litaralna paru «ŭspyšak», kali na nievialikich učastkach lesu možna było sabrać adzin-dva košyki hryboŭ, kali paśpieć znajści ich pieršym.
Surazmoŭca dadaje: hrybny nieŭradžaj pačaŭsia jašče viasnoj, kali ŭ lasach pavinny byli vyraści smaržki — adny z samych papularnych hryboŭ u śviecie.
— Pavodle analityki babrujskaj daśviedčanaj hrybnicy Maryi Nikitko, jakaja vyvučaje reakcyju smaržkoŭ na nadvorje ŭžo 18 hadoŭ, paśla maroznych śniežnych zim hetych hryboŭ zaŭsiody vielmi šmat, — tłumačyć Alaksandr Harbacevič.
— Sioleta ŭmovy nadvorja byli mienavita takimi. Bolš za toje, niekalki dzion tempieratura ŭdzień padymałasia da +15 hradusaŭ, a nočču apuskałasia da +5: taki tempieraturny režym padtrymlivajuć kitajcy na svaich smaržkovych fiermach. Zychodziačy z usiaho hetaha, my čakali vialikaha ŭradžaju smaržkoŭ, a na spravie ich praktyčna nie było. Heta byŭ najhoršy siezon za 18 hadoŭ. Tłumačeńniaŭ tamu, što adbyłosia, niama ni ŭ ekśpiertaŭ «cichaha palavańnia», ni ŭ mikołahaŭ.
Alaksandr pierakanany: sioletni siezon pakazvaje, što ŭ pryrodzie isnujuć niejkija źmieny, jakija ludzi pakul nie vyjavili.
— Pra situacyju sa smaržkami ja pytaŭsia ŭ NAN Biełarusi, i navukoŭcy vykazali zdahadku, što dla pošuku adkazu treba analizavać nie zimu i viasnu, a vosień papiaredniaha hoda, bo mienavita tady hryby pačynajuć farmavacca, — kaža hrybnik.
Ale napieradzie jašče ŭsia vosień — mahčyma, jana paraduje biełarusaŭ bahaćciem daroŭ lesu.
Kamientary