Češski sud admianiŭ admovu ŭ mižnarodnaj abaronie 23‑hadovamu biełarusu Jakavu Kudzialeviču, jaki pravioŭ 73 dni ŭ komie
21 žniŭnia sud razhledzieŭ apielacyju na admovu ŭ mižnarodnaj abaronie 23‑hadovamu biełarusu Jakavu Kudzialeviču i vynies rašeńnie na karyść maładoha čałavieka.
Pra heta ŭ svaim fejsbuku paviedamiŭ jahony baćka Dźmitryj Kudzialevič.
— Rašeńnie na našu karyść! Nahladny prykład, jak niezaležna adna ad adnoj pracujuć dźvie haliny ŭłady — sudovaja i vykanaŭčaja, — napisaŭ Kudzialevič.
Jakaŭ Kudzialevič pakinuŭ Biełaruś paśla pratestaŭ 2020 hoda, kali jamu było 17 hadoŭ. Jon niekalki hadoŭ vučyŭsia ŭ Čechii, adnak paźniej sutyknuŭsia z prablemami lehalizacyi i padaŭ zajavu na mižnarodnuju abaronu. Jahony baćka Dźmitryj žyvie ŭ Polščy.
Ministerstva ŭnutranych spraŭ Čechii pieršapačatkova admoviła maładomu čałavieku ŭ abaronie, paśla čaho rašeńnie było abskardžana ŭ sudzie.
Na pačatku krasavika syn pierastaŭ kantaktavać z baćkam. U vyniku Jakava znajšli biez prytomnaści na padłozie ŭ jahonym pakoi ŭ pryjomnym centry dla mihrantaŭ, jakija chadajničajuć ab mižnarodnaj abaronie. Pavodle daktaroŭ Jakaŭ pryniaŭ šerah miedyčnych preparataŭ i znachodziŭsia biez prytomnaści adzin kala sutak. Chłopca terminova pieravieźli ŭ špital. U komie jon pravioŭ 73 dni, a ŭ kancy červienia vyjšaŭ ź jaje.
Dźmitryj Kudzialevič raskazvaŭ, što jamu 24 červienia niečakana patelefanavała žonka i skazała: «Dźmitryj, z taboj choča pahavaryć syn. Dla mianie heta było jak hrom siarod jasnaha nieba. 73 dni syn znachodziŭsia ŭ hłybokaj komie. I kali ja ŭziaŭ słuchaŭku, jon kaža: «Dobry dzień, tata». Heta ciažka pieradać, nakolki heta było mocna i pranikliva».
Ciapier čytajuć
«Dziakuj, motabracie!» Słucki matacyklist dapamoh salihorskaj chutkaj vyjhrać čas dla ciažkachvoraha1
Kamientary