U Hrodnie kala Farnaha kaścioła zapuścili prajekcyjny piešachodny pierachod FOTY
U Hrodnie kala Farnaha kaścioła zapracavała pieršaja ŭ horadzie prajekcyjnaja sistema dla piešachodnaha pierachodu. Jaje ŭstalavali nasuprać kaścioła i ŭžo ŭklučyli, piša «AvtoHrodno».
Pra novaje abstalavańnie Dziaržaŭtainśpiekcyja paviedamiła 22 vieraśnia. Na rehulavanych piešachodnych pierachodach na vulicach Kalučynskaj i Karła Marksa ŭstalavali dadatkovyja śvietłavyja pryłady, jakija prajecyrujuć sihnały piešachodnaha śviatłafora niepasredna na pavierchniu tratuara.
Kala Farnaha kaścioła na tratuar prajecyrujucca zialonaja abo čyrvonaja śvietłavyja linii. Pry hetym zvyčajny śviatłafor praciahvaje pracavać u štatnym režymie, a prajekcyja źjaŭlajecca dadatkovym srodkam biaśpieki.
Čyrvonaja linija raźmiaščajecca prykładna za mietr ad prajeznaj častki. Miarkujecca, što jana moža dadatkova źviartać uvahu piešachodaŭ na miažu, za jakuju nie varta zachodzić, i nie dazvalać im padychodzić zanadta blizka da aŭtamabilaŭ. Asabliva heta moža być karysnym dla ludziej, jakija adchilili svaju ŭvahu na ekran telefona i nie hladziać napierad.
Raniej u Hrodnie ŭžo vypraboŭvali inšyja śvietłavyja rašeńni. Na vulicy Ažeški pracavaŭ prajektar, jaki vyvodziŭ jarkuju «ziebru» niepasredna na prajeznuju častku, pakolki tam na brukavancy nie nanosili farbaj darožnuju raźmietku. Hety prajekt ustalavała pryvatnaja kampanija dla demanstracyi mahčymaściaŭ technałohii, ale ad pastajannaha vykarystańnia takoha rašeńnia paźniej admovilisia.
Padobnyja prajekcyjnyja sistemy ŭžo vykarystoŭvalisia i ŭ inšych haradach Biełarusi. U Minsku pieršy taki prajektar ustalavali ŭ 2022 hodzie kala parku imia Uha Čaviesa. Raniej na adnym ź pierachodaŭ praz vulicu Lenina sihnał śviatłafora taksama dublavaŭsia śviatłodyjodami, ubudavanymi ŭ tratuar.
U Hrodnie na vulicy Tkackaj kala ŭzvyšanaha piešachodnaha pierachodu taksama ekśpierymientavali sa śviatłodyjodami, ubudavanymi ŭ asfalt. Jany jarka mirhali ŭ ciomny čas sutak i pryciahvali ŭvahu piešachodaŭ. Adnak ekśpierymient nie atrymaŭ praciahu, bo sistema nie vytrymała zimovych umoŭ i vychodziła sa stroju.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła24
Kamientary