Siarhiej Cichanoŭski: Tvajho muža topiać, a ty byccam u ładki plaskaješ
«Ja pa-biełarusku razmaŭlaŭ bolš i lepš, čym Śviatłana Hieorhijeŭna. Ale ja nie kanjunkturščyk».
Były palitviazień Siarhiej Cichanoŭski pravioŭ na svaim jutub-kanale amal piacihadzinny strym. Padčas vystupleńnia jon nieadnarazova ŭzhadvaŭ svaju žonku Śviatłanu Cichanoŭskuju.
Spačatku Cichanoŭski zhadaŭ niadaŭniaje intervju Śviatłany Kanstancinu Kavierynu i Marynie Mientusavaj:
«Chto nie bačyŭ hetaje intervju Śviatłany Hieorhijeŭny (…), pahladzicie, bo ŭ hetym intervju ja nie viedaju, jaki pijarščyk. Nu tam Krasulina — jana ž nie pijarščyk, heta pustoje miesca. Jana, napeŭna, adpraviła razam z [Frankam] Viačorkam tudy Śviatłanu Hieorhijeŭnu. Heta prosta žach (…). Pahladzicie hetaje intervju — vy zrazumiejecie, što absalutnaja pamyłka była tudy iści. Absalutnaja.
Śviatłanie Hieorhijeŭnie ŭ biełaruskija ŚMI, dy naohuł u lubyja, pa-mojmu, pamyłka iści, ale voś tam była prosta pamyłka z pamyłak».
Pavodle Cichanoŭskaha, jahonaja žonka ŭ tym intervju «nie zmahła adkazać ni na adno pytańnie», i jon dadaje:
«Ni na adno — moža, na adno tam takoje durnoje niejkaje pytańnie adkazała. Ni na adno. Heta žach».
Jon taksama pakpiŭ z taho, što Śviatłana Cichanoŭskaja nibyta pieradumała nakont prezidenctva:
«Darečy, źviarnicie ŭvahu: Śviatłana Hieorhijeŭna fantazii na temu, što jana stanie prezidentam Biełarusi, stała ŭžo padtrymlivać. Jana ŭžo adkazvaje na pytańni jak prezident, heta značyć «ja budu», kaža, «prezidentam» užo.
A raniej jana kazała, što nie pojdzie na prezidenckija vybary, kali buduć novyja vybary ŭ Biełarusi. Hałoŭnaje, kab biez Łukašenki. A ciapier jaje ŭžo pierakanali hetyja Viačorki, usie hetyja chłopcy i zachodnija partniory (…), i jana ŭžo pačynaje iści patrochu. Nie źviarnuli ŭvahu? Heta vielmi śmiešna».
Nie spadabałasia jamu i toje, što ŭ intervju nie było pytańniaŭ pra jaho samoha: «Paralelna idzie skandał ź jaje mužam (…). Skandał idzie — i nivodnaha pytańnia pra muža».
Potym Cichanoŭski rastłumačyŭ, čamu na strymach havoryć pa-rusku:
«Pa-biełarusku mała, siabry. Tak, na 2% pa-biełarusku razmaŭlaju. Ja razumieju, što treba, ale ja chaču, kab mianie razumieli tyja, chto pa-rusku razmaŭlaje, i nie tolki biełarusy. (…) Nu, siabry, heta maja rodnaja mova. Ja pa-biełarusku vielmi dobra razmaŭlaŭ, paviercie.
Ja pa-biełarusku razmaŭlaŭ bolš i lepš, čym Śviatłana Hieorhijeŭna. Ale ja nie kanjunkturščyk».
Pad kaniec efiru jon zhadaŭ svoj kanflikt z błohierkaj Volhaj Takarčuk.
«I žonka, jakuju taja nazyvaje svajoj siabroŭkaj, — nasamreč nijakaja jana joj nie siabroŭka, — jana taksama śmiajecca (…). Bačycie, u jaje takaja pazicyja: nie vystupać u ŚMI, nijak nie kamientavać.
Heta značyć, tvajho muža topiać, a ty byccam u ładki plaskaješ. I heta vielmi dziŭna, tak? Nu, nie toje što dziŭna — heta šmat pra što kaža».
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary