Faktyčna ŭ Kramli nie stali ni paćviardžać, ni abviarhać paviedamleńni pra mahčymy vypadak čumy ŭ Irkuckaj vobłaści.
Pres-sakratar Uładzimira Pucina Dźmitryja Piaskoŭ prakamientavaŭ paviedamleńni pra mahčymy vypadak zaražeńnia čumoj u Irkuckaj vobłaści.
«Hałoŭnym viedamstvam, jakoje kampietentnaje ŭ hetaj halinie, źjaŭlajecca Rasspažyŭnahlad. I mienavita na aficyjnyja zajavy Rasspažyŭnahladu treba aryjentavacca, nie słuchajučy roznyja čutki, roznyja razvažańni», — zajaviŭ Piaskoŭ.
Jon dadaŭ, što ŭ viedamstvie «pracujuć vysokija prafiesijanały ŭ hetaj halinie», i znoŭ zaklikaŭ daviarać ich aficyjnym paviedamleńniam.
Padstavaj dla razmoŭ pra čumu stała śmierć supracoŭnicy Irkuckaha supraćčumnaha instytuta. Žančynu špitalizavali 29 vieraśnia ź simptomami ciažkaj pnieŭmanii, a ŭ noč z 1 na 2 kastryčnika jana pamierła.
Miedyja ahučyli viersiju zaražeńnia, pavodle jakoj 28‑hadovaja supracoŭnica Irkuckaha supraćčumnaha instytuta Darja Šypiłava raźbiła prabirku z uzbudžalnikam lohačnaj čumy. Dziaŭčyna pamierła. Aficyjnaha paćvierdžańnia hetaj viersii pryčyn jaje śmierci nie było.
Paśla śmierci Šypiłavaj Šelechaŭskuju balnicu, dzie jana znachodziłasia, zakryli na karancin. Pad miedycynskaje nazirańnie ŭziali 189 čałaviek, jakija kantaktavali z žančynaj. Hubiernatar Irkuckaj vobłaści Ihar Kobzieŭ zajaviŭ, što prykmiet zachvorvańnia ŭ ich nie vyjavili.
Rasspažyŭnahlad paviedamiŭ, što praviedzienyja daśledavańni nie vyjavili mikraarhanizmaŭ, źviazanych z prafiesijnaj dziejnaściu pamierłaj. Aficyjna jaje dyjahnaz sfarmulavali jak «pnieŭmaniju niavyznačanaj etyjałohii». Pavodle viedamstva, sanitarna-epidemijałahičnaja situacyja ŭ rehijonie zastajecca stabilnaj.
Tym časam Kazachstan, Kyrhyzstan i Uźbiekistan uzmacnili miery zaściarohi. Na pamiežnych punktach praviarajuć ludziej, transpart i hruzy, a słužby, jakija adkazvajuć za niedapuščeńnie zavozu asabliva niebiaśpiečnych infiekcyj, pieraviali ŭ režym pavyšanaj hatoŭnaści.
Za raźvićciom situacyi sočyć i Bieły dom. Pavodle krynicy Axios u administracyi Donalda Trampa, amierykanskija ŭłady viedajuć pra paviedamleńni z Rasii, adsočvajuć ich i «aceńvajuć mahčymyja varyjanty».
Čumu vyklikaje bakteryja Yersinia pestis. Najbolš niebiaśpiečnaja lohačnaja forma moža pieradavacca ad čałavieka da čałavieka praz dychalnyja šlachi. Pry svoječasovym lačeńni antybijotykami chvaroba vylečvajecca, adnak biez chutkaj miedycynskaj dapamohi jana pryvodzić da śmierci.
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła22
Kamientary