«Ja — Džejn Dou». Sprava ab hrupavym zhvałtavańni ŭ elitnym univiersitecie zapuściła novy suśvietny fłešmob

«Džejn Dou» — umoŭnaje imia, jakim u amierykanskich sudach nazyvajuć žančynu, kali jaje asobu nie raskryvajuć.

Mienavita pad takim imiem byłaja studentka adnaho z samych prestyžnych univiersitetaŭ ZŠA padała pazoŭ suprać siami mužčyn, univiersiteta i studenckich arhanizacyj.

Pavodle pazovu, u noč na 20 kastryčnika 2024 hoda siem členaŭ mužčynskaha braterstva Chi Phi niekalki hadzin hvałtavali 20‑hadovuju dziaŭčynu. Jana śćviardžaje, što znachodziłasia pad uździejańniem ałkaholu i kietaminu i nie mahła dać uśviadomlenaj zhody.

Paśla zdareńnia dziaŭčyna kinuła vučobu. U vieraśni 2026 hoda jana źviarnułasia ŭ sud, abvinavaciŭšy Karnielski ŭniviersitet u tym, što toj nie zdoleŭ jaje abaranić i niedastatkova stroha pakaraŭ udzielnikaŭ.

U miedyja siemiarych mužčyn stali nazyvać «karnielskaj siamiorkaj».

Navošta ludzi nazyvajuć siabie Džejn Dou

Zakony štata Ńju-Jork dazvalajuć paciarpiełym ad seksualizavanaha hvałtu źviartacca ŭ sud ananimna. Adnak paśla publikacyi pazovu niekatoryja karystalniki sacsietak pačali vyśviatlać, chto ž mienavita chavajecca pad imiem Džejn Dou.

Adnym ź ich staŭ amierykanski žurnalist i palityčny ahladalnik Majkł Trejsi. Jon śćviardžaŭ, što hramadstva pavinna viedać imia žančyny, pakolki ŭ pazovie nazvanyja imiony abvinavačanych mužčyn. Urešcie Trejsi apublikavaŭ imia, jakoje paličyŭ sapraŭdnym, ale paźniej vydaliŭ dopis.

U adkaz sacsietki zapoŭnili paviedamleńni: «Ja — Džejn Dou». Udzielniki fłešmobu spadziajucca, što vialikaja kolkaść adnolkavych dopisaŭ zabłytaje pošukavyja ałharytmy i ŭskładnić sproby znajści sapraŭdnaje imia dziaŭčyny.

Adnačasova ludzi pačali raskazvać u hetych dopisach pra pieražytyja damahańni i seksualizavany hvałt, u tym liku va ŭniviersitetach. Tamu #IamJaneDoe paraŭnoŭvajuć z rucham #MeToo, jaki pačaŭsia paśla abvinavačańniaŭ suprać halivudskaha pradziusara Charvi Vajnštejna.

«Joj nialohka. Jaje ckujuć u sacsietkach», — raskazaŭ advakat dziaŭčyny. Pavodle jaho, karystalniki pamyłkova prymali za jaho klijentku niekalkich inšych žančyn, jakija taksama stali abjektami pieraśledu.

Što viadoma pra spravu

U materyjałach pazovu jość zdymak hrupavoha čata bractva Chi Phi. Jaho ŭdzielniki ŭ hrubaj formie abmiarkoŭvali mahčymaść «biaspłatnaha» seksualnaha kantaktu z Džejn Dou.

Praz dva dni paśla mierkavanaha hvałtu adzin z mužčyn napisaŭ dziaŭčynie, što škaduje ab tym, «jak usio adbyłosia». Jon pryznaŭ, što drenna pamiataje tuju noč.

Adkazy dziaŭčyny byli supiarečlivymi. Jana taksama pisała, što jaje pamiać «vielmi zatumanienaja», a ŭsie ŭdzielniki byli pjanyja. U adnym paviedamleńni jana zajaviła, što «ničoha z seksualnych dziejańniaŭ nie było niezakonnym»

Padčas paźniejšaha dopytu dziaŭčyna kazała, što na pačatku nočy pahadžałasia na toje, što adbyvałasia. Ale pra nastupnyja padziei jana zajaviła palicyi: «Ja mahu sa stapracentnaj upeŭnienaściu skazać, što mianie zhvałtavali».

U inšym pratakole zapisanyja jaje słovy: «Ja adčuvała, što nie mahu prymać nijakich rašeńniaŭ praz toje, nakolki mocna była pjanaja».

U 2024 hodzie abvinavačańni nikomu nie vystavili. Prakuratura paličyła, što dokazaŭ niedastatkova.

Dziaŭčyna abvinavaciła ŭniviersitet u tym, što jon nie abaraniŭ jaje i niedastatkova stroha pakaraŭ udzielnikaŭ. Pavodle pazovu, niekatorym ź ich prapanavali źmiakčyć adkaznaść, napisaŭšy ese.

Paśla hramadskaha rezanansu hubiernatar Ńju-Jorka Keci Chokuł pieradała adnoŭlenaje rasśledavańnie hienieralnamu prakuroru štata Letycyi Džejms.

«Novaja infarmacyja vyklikała surjoznyja pytańni nakont taho, jak viałasia hetaja sprava», — patłumačyła Chokuł.

Univiersitet zajaŭlaje, što pravioŭ ułasnaje rasśledavańnie i pakaraŭ udzielnikaŭ: niekatorych adličyli, inšych časova adchilili ad vučoby. Pry hetym univiersitet nie admaŭlaje, što častkaj pakarańnia dla niekatorych mahło być napisańnie ese.

Bractva Chi Phi paviedamiła, što vyklučyła abvinavačanych sa svaich šerahaŭ, a jaho miascovaje adździaleńnie zakryli jašče ŭ 2024 hodzie. Adzin ź siami mužčyn praz advakata admaŭlaje datyčnaść da seksualnych dziejańniaŭ i ŭžyvańnia kietaminu.

Sprava pakul nie zavieršanaja, a vina nikoha z mužčyn nie dakazanaja ŭ sudzie. Ale jana znoŭ pastaviła pytańnie, ci mohuć paciarpiełyja ad seksualizavanaha hvałtu raskazvać pra pieražytaje, nie ryzykujučy sami stać abjektami ckavańnia.

• 0
• 4
• 1
• 11
• 2
• 3
• 3
• 0