Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač

Heta mama Baženy Jaremič, jakaja ŭznačalvaje Nacyjanalnuju škołu pryhažości. Płošča asabniaka na vulicy Ratamskaj składaje 610 kvadratnych mietraŭ, jon pabudavany na ŭčastku płoščaj 14 sotak.

Novy katedž Jaremič uvachodzić u kompleks «Alimpik Park» pobač z zakaźnikam «Lebiadziny». Ziamielnyja ŭčastki pad jaho budaŭnictva dastalisia zabudoŭščyku «Tapas» pavodle ŭkaza Łukašenki biez aŭkcyjonu, raboty vialisia ŭ 2019—2020 hadach nasupierak pratestam ekołahaŭ.

U vyniku źjavilisia niekalki šmatpaviarchovikaŭ, šeść dupleksaŭ i zakrytaja vułačka z 13 katedžami.

Pavialičyć

Irena Jaremič kupiła hety asabniak u lutym 2025 hoda ŭ Lilii Biełaj — mamy pradprymalnika Paŭła Biełaha, jakomu naležyć «Tapas», što pabudavaŭ hety dom. Sama Biełaja nabyła jaho ŭsiaho za dva tydni da pieraprodažu, suma toj ździełki skłała 837 tysiač dalaraŭ.

Cikava, što heta nie adziny vypadak, kali Lilija vystupała pramiežkavaj uładalnicaj nieruchomaści. Pavodle padlikaŭ «Lusterka», praz žančynu prajšło jak minimum šeść kvater i dva damy, jakija jana pradavała mienš čym praz hod paśla nabyćcia.

Navošta spatrebiłasia takaja schiema, dakładna nieviadoma. Za kadram mahli zastacca niarynkavy košt, źnižka abo niefarmalnaja rasterminoŭka.

Chto takaja Irena Jaremič i čym viadomaja jaje dačka Bažena

Bažena Jaremič za apošnija hady zrabiła imklivuju karjeru. Paśla vizitu Alaksandra Łukašenki ŭ jaje VNU dziaŭčyna pačała pryjazdžać na mierapryjemstvy ź jaho ŭdziełam. U 2020 hodzie jana na vydatna skončyła jurydyčny fakultet Hrodzienskaha dziaržaŭnaha ŭniviersiteta.

U lutym 2021 hoda 21‑hadovaja jurystka apynułasia ŭ prezidyumie padčas Usiebiełaruskaha narodnaha schodu, a ŭ kastryčniku ŭznačaliła Nacyjanalnuju škołu pryhažości.

Pavialičyć

Zaraz Baženie Jaremič 27 hadoŭ, jana ŭvachodzić u Minharsaviet. Jana rehularna źjaŭlajecca na mierapryjemstvach z udziełam Alaksandra Łukašenki — naprykład, hetaj viasnoj padmiatała ziamlu, pakul jon sadžaŭ drevy na subotniku.

Niadaŭna jana vyjšła zamuž.

Pavialičyć

Jaje mama Irena — nie publičny čałaviek. U 2021 hodzie Bažena raskazvała, što taja pracuje prybiralščycaj. U niejki momant žančyna była aformlenaja na pracu dvornikam.

U intervju Jaremič nazyvała mamu svajoj najlepšaj siabroŭkaj. Baćka Baženy Jaremič, Viktar, — rabočy na meblevaj vytvorčaści.

Jaremič kazała, što ni ŭ adnaho ź jaje baćkoŭ niama vyšejšaj adukacyi.

Pavodle jaje słoŭ, mama i tata zaŭsiody jaje padtrymlivali, a ciapier dapamahajuć vychoŭvać dzicia.

• 1
• 0
• 6
• 13
• 3
• 1
• 11
• 0