U Polščy adbyŭsia jašče adzin napad z nažom u škole, jość paranienyja
U Varšavie 21‑hadovaja dziaŭčyna napała z nažom na troch dziaŭčat u kompleksie škoł dla darosłych. U vyniku napadu paciarpieli dźvie niepaŭnaletnija va ŭzroście 17 hadoŭ i 24‑hadovaja žančyna, paviedamiŭ Polsat.
Zdareńnie adbyłosia pierad sakrataryjatam navučalnaj ustanovy na vulicy Minskaj u varšaŭskim rajonie Praha. Paviedamleńnie pra napad pastupiła ŭ ekstrannyja słužby kala 12:30. Pavodle kamisara Jaceka Višnieŭskaha, palicyja prybyła na miesca ŭžo praz čatyry chviliny.
Adnu z 17‑hadovych dziaŭčat dastavili ŭ balnicu z rezanymi ranami pieradplečča. Jaje stan nie pahražaŭ žyćciu. Dvum inšym paciarpiełym špitalizacyja nie spatrebiłasia.
Napadnicu abiasškodziŭ supracoŭnik navučalnaj ustanovy, paśla čaho pieradaŭ jaje palicyi. Kali pravaachoŭniki prybyli na miesca, jany ŭžo zmahli kanfiskavać u dziaŭčyny nož.
Matyvy napadu pakul nie vyśvietlenyja. Pa słovach palicyi, niama paćviardžeńniaŭ taho, što napadnica i adna z paciarpiełych byli znajomyja. Viadoma, što 21‑hadovaja dziaŭčyna vučycca ŭ hetaj ustanovie, a 24‑hadovaja žančyna pryjšła tudy ŭ dzień zdareńnia, kab padać dakumienty. Śledčyja pravodziać nieabchodnyja dziejańni ŭ dačynieńni da padazravanaj i apytvajuć dźviuch paciarpiełych, jakim nie spatrebiłasia špitalizacyja.
Napad adbyŭsia na fonie šerahu inšych incydentaŭ u polskich navučalnych ustanovach. Paśla trahičnych padziej u škołach Mazavieckaha vajavodstva polskaja palicyja pravieryła amal 50 tysiač navučalnych ustanoŭ. Pa ŭsioj krainie zatrymali 76 čałaviek i zafiksavali bolš za 230 incydentaŭ.
U čaćvier u pačatkovaj škole ŭ vioscy Laščyduł-Naviny Vyškaŭskaha pavieta 15‑hadovy padletak, jaki raniej tam vučyŭsia, napaŭ z nažom na troch čałaviek, u tym liku na supracoŭnicu škoły i dyrektara. Žančyna pamierła, niahledziačy na sproby reanimacyi.
Napiaredadni dzieviać čałaviek atrymali ranieńni padčas napadu ŭ kompleksie prafiesijnych škoł № 4 u polskim horadzie Astrałenka. U sieradu ŭ horadzie Sierpc palicejskaja apieracyja dazvoliła praduchilić jašče adzin napad.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła23
Kamientary