«Najlepšy adkaz demakratyjaŭ — pakazać zuby». Cichanoŭskaja vystupiła na Vilenskim samicie svabody
15 kastryčnika ŭ Vilni biełaruskaja lidarka vystupiła z asnoŭnaj pramovaj na Vilnius Freedom Summit, arhanizavanym Ministerstvam zamiežnych spraŭ Litvy i Freedom House.
Samit abjadnoŭvaje pradstaŭnikoŭ demakratyčnych uradaŭ, pravaabaroncaŭ, byłych palitviaźniaŭ i hramadzianskaj supolnaści ź Jeŭropy i Łacinskaj Amieryki, paviedamlaje pres-słužba Śviatłany Cichanoŭskaj.
Siarod udzielnikaŭ — ministr zamiežnych spravaŭ Litvy Kiastucis Budrys, kiraŭnik Freedom House Džejmi Fłaj, nobieleŭski łaŭreat Aleś Bialacki, ukrainski žurnalist i były viazień danieckaj turmy «Izalacyja» Stanisłaŭ Asiejeŭ, a taksama pradstaŭniki demakratyčnych ruchaŭ Vieniesueły, Kuby i Nikarahua.
U centry prahramy — dźvie temy: padtrymka palitviaźniaŭ i pravaabaroncaŭ, supraćdziejańnie supracoŭnictvu aŭtarytarnych režymaŭ. Jak Jeŭropa i ZŠA mohuć razam reahavać na abmien technałohijami sačeńnia i mietadami represijaŭ, abychod sankcyj, dezynfarmacyju i pieraśled ludziej za miažoj.
U svajoj pramovie Śviatłana Cichanoŭskaja zaklikała demakratyčnyja krainy zachoŭvać adzinstva i rašuča adkazvać na dziejańni dyktataraŭ.
«Dyktatary sprabujuć nas padzialić. Jany praviarajuć našyja krainy na adzinstva. Vypraboŭvajuć našu salidarnaść. Jany šukajuć našyja słabyja miescy, kab vykarystać ich suprać nas. I najlepšy adkaz demakratyjaŭ — pakazać zuby. Pakazać svaju siłu. Padtrymlivać adno adnaho. Dla nas, biełarusaŭ, jak i dla mnohich inšych narodaŭ, Jeŭropa — heta naša meta. Jeŭropa — heta naša siamja», — zajaviła palityk.
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła24
Kamientary