Sud u Kijevie znoŭ pieranios razhlad spravy biełaruskaj špijonki Iny Kardaš

Pieršapačatkova płanavałasia, što 21 vieraśnia sud razhledzić abvinavaŭčy akt, vystaŭleny va Ukrainie hramadziancy Biełarusi Inie Kardaš, ale tady pasiadžeńnie pieranieśli.

Sudździa, jakomu daručyli jaje razhlad, nie źmianiŭsia. Heta Aleś Sałaŭjoŭ, jaki pracuje ŭ Piačerskim sudzie Kijeva z 2025 hoda. U hetaj ustanovie zvyčajna razhladajuć hučnyja palityčnyja spravy. Raniej Sałaŭjoŭ pracavaŭ u Dziaśnianskim rajonnym sudzie Kijeva, a jašče raniej — u Kastryčnickim rajonnym sudzie Maryupala. Paśla akupacyi horada rasijskimi vojskami jaho nakiravali ŭ kamandziroŭku ŭ Kijeŭ.

Jak stała viadoma «Radyjo Svaboda», sudovaje pasiadžeńnie pieranieśli ŭžo druhi raz. 21 vieraśnia jano nie adbyłosia praz adsutnaść sudździ, jaki, jak paviedamlałasia, u toj dzień znachodziŭsia ŭ słužbovaj kamandziroŭcy. 14 kastryčnika pasiadžeńnie pieranieśli, vierahodna, praź vielmi mocny abstreł Kijeva. Nieŭzabavie pavinny nazvać novuju datu sudovaha pasiadžeńnia.

Viadoma, što prynamsi razhlad abvinavaŭčaha akta budzie prachodzić u adkrytym režymie.

Tym časam stała viadoma, što jašče ŭ žniŭni sud abaviazaŭ śledčaha pa spravie Iny Kardaš viarnuć jaje mužu 2150 dalaraŭ, kanfiskavanych padčas pieratrusu.

Pierad hetym muž žurnalistki, dobraachvotnik, jaki słužyć u šturmavym padraździaleńni, prynios u sud kvitancyi ab źniaćci hrošaj u bankamacie ź jaho bankaŭskaj kartki. Na hetaj padstavie sud, niahledziačy na piarečańni śledčaha, pryznaŭ, što hrošy naležać mužu Kardaš, i pastanaviŭ źniać ź ich aryšt.

Adnak śledčy SBU, niahledziačy ŭžo jak minimum na dva sudovyja rašeńni pa hetym pytańni, hrošy nie viarnuŭ. U vyniku muž Kardaš paskardziŭsia ŭ sud na biaździejnaść śledčaha. Vyniki razhladu hetaj skarhi pakul nieviadomyja.

Inu Kardaš zatrymali 21 studzienia hetaha hoda i abvinavacili ŭ špijanažy na karyść Kamiteta dziaržaŭnaj biaśpieki Biełarusi.

Na momant zatrymańnia Kardaš užo pracavała ŭ Kaardynacyjnym štabie pa pytańniach abychodžańnia z vajennapałonnymi Hałoŭnaha ŭpraŭleńnia raźviedki Ministerstva abarony Ukrainy. Pavodle materyjałaŭ śledstva, jana padtrymlivała kantakty z KDB praz hramadzianina Biełarusi, jaki, jak śćviardžajecca, «śviadoma ažyćciaŭlaŭ dla jaje kanfidencyjnaje supracoŭnictva sa śpiecsłužbami Biełarusi».

20 krasavika stała viadoma, što sud aryštavaŭ kvateru Iny Kardaš, kab zabiaśpiečyć viadzieńnie kryminalnaj spravy.

Rasśledavańnie spravy pavinna było zaviaršycca 20 červienia.

U pačatku maja kiraŭnik sakrataryjata Kaardynacyjnaha štaba pa pytańniach abychodžańnia z vajennapałonnymi Bahdan Achrymienka paviedamiŭ, što Minsk źviartaŭsia da Kijeva nakont abmienu Iny Kardaš.

«Taki sihnał byŭ, ale, akramia razmoŭ, pakul ničoha niama. My adkrytyja dla prapanoŭ. My nie zacikaŭlenyja ŭ tym, kab utrymlivać zamiežnych złačyncaŭ u našaj krainie i marnavać na ich biudžetnyja srodki ŭ toj čas, kali našy niezakonna asudžanyja hramadzianie znachodziacca za kratami ŭ niečałaviečych umovach. Kali ŭ pracesie kamunikacyi źjaviacca praktyčnyja prapanovy, my ich razhledzim», — skazaŭ Bahdan Achrymienka ŭ intervju ahienctvu «Ukrinfarm».

• 0
• 0
• 0
• 0
• 0
• 0
• 0
• 0