Kijeŭ prapanoŭvaŭ pieradać zatrymanuju za špijanaž biełarusku Kardaš nie tolki Minsku
Kijeŭ prapanoŭvaŭ abmianiać hramadzianku Biełarusi Inu Kardaš, zatrymanuju sioleta ŭ studzieni pa padazreńni ŭ špijanažy na karyść Kamitetu dziaržaŭnaj biaśpieki Biełarusi, nie tolki Biełarusi, ale i Rasii, piša «Svaboda».
Kiraŭnik sakrataryjatu Kaardynacyjnaha štabu Bahdan Achrymienka ŭ adkazie na zapyt «Svabody» padkreśliŭ, što ŭkrainskaja dziaržava adkrytaja da abmierkavańnia lubych sposabaŭ viartańnia ŭkrainskich hramadzian, pazbaŭlenych svabody. U tym liku hatovaja da pieradačy Rasii i Biełarusi ich hramadzian, jakich va Ukrainie abvinavačvajuć u špijanažy abo jakija ŭžo adbyvajuć pakarańnie pavodle adpaviednych artykułaŭ Kryminalnaha kodeksu krainy.
«I rasijskaja ŭłada, i ŭłada Biełarusi prainfarmavanyja ab mahčymaści i hatoŭnaści Ukrainy da takoha pracesu. Ale nie pieršyja, ni druhija nie śpiašajucca zabirać svaich pravalenych ahientaŭ, pra što śviedčyć statystyka dziaržaŭnaha prajektu «Chaču da svaich», — adznačyŭ kiraŭnik sakrataryjatu Kaardynacyjnaha štabu ŭ pytańniach abychodžańnia z vajennapałonnymi.
Bahdan Achrymienka ŭdakładniŭ, što ŭ pieralik prajektu «Chaču da svaich» uklučyli bolš za 400 proźviščaŭ kałabarantaŭ i špijonaŭ. Bolšaść ź ich čakajuć takoha abmienu 6‑8 miesiacaŭ, a ŭ niekatorych vypadkach — amal dva hady.
U toj ža čas pradstaŭnik Kaardynacyjnaha štabu nie adkazaŭ na pytańnie ab ahulnym liku hramadzian Ukrainy, jakija znachodziacca ŭ turmach Biełarusi i častku jakich pieradavali Kijevu razam z vajennapałonnymi ci biełaruskimi palitviaźniami.
«U metach biaśpieki ŭsich udzielnikaŭ pracesu my nie kamientujem hetaje pytańnie, pakolki heta moža paškodzić arhanizacyi budučych padobnych zachadaŭ», — padkreśliŭ Bahdan Achrymienka.
Inu Kardaš zatrymali sioleta 21 studzienia i vystavili joj padazreńni ŭ špijanažy na karyść Kamitetu dziaržaŭnaj biaśpieki Biełarusi.
Na momant zatrymańnia Ina Kardaš užo pracavała ŭ Kaardynacyjnym štabie ŭ pytańniach abychodžańnia z vajennapałonnymi Hałoŭnaha ŭpraŭleńnia vyviedki Ministerstva abarony Ukrainy.
Pavodle śledstva, jana kantaktavała z KDB praz hramadzianina Biełarusi, jaki «ŭśviadomlena dla jaje ažyćciaŭlaŭ kanfidencyjnuju supracu ź śpiecsłužbami Biełarusi».
Dasudovaje rasśledavańnie jaje spravy zakončyli. Paśla sudovaha razhladu abvinavaŭčaha aktu na jaho adpaviednaść ukrainskamu zakanadaŭstvu sud pavinien pačać razhladać spravu pa sutnaści. Ciapier Ina Kardaš znachodzicca ŭ Kijeŭskim SIZA.
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć1
Kamientary
A na hramadzian Biełarusi, jakija abaraniali Ukrainu i ciapier znachodziacca ŭ pałonie, nam pofih - dadaŭ Bahdan Achrymienka