Alaksandr Łukašenka 19 kastryčnika padpisaŭ ukaz № 367 «Ab dziejnaści Nacyjanalnaj akademii navuk Biełarusi». Dakumient praduhledžvaje źmieny ŭ arhanizacyi pracy NAN, jaje struktury i dziejnaści padparadkavanych ustanoŭ. Zajaŭlenaja meta — umacavańnie navukovaha i vytvorčaha patencyjału, pavyšeńnie praktyčnaj skiravanaści i efiektyŭnaści daśledavańniaŭ, piša BiełTA.
Ukaz praduhledžvaje likvidacyju, rearhanizacyju i pieraŭtvareńnie šerahu dziaržaŭnych navukovych ustanoŭ i navukova-praktyčnych centraŭ Akademii navuk. Na dumku ŭładaŭ, heta pavinna dapamahčy pazbavicca ad dublavańnia funkcyj i zasiarodzić resursy na vyrašeńni pryjarytetnych dla dziaržavy prykładnych zadač u halinie technałohij i techniki. Taksama zaćvierdžany novy varyjant statuta NAN.
Dla ŭzmacnieńnia kiraŭničaj viertykali i piersanalnaj adkaznaści kiraŭnictva status dziaržaŭnych cyvilnych słužboŭcaŭ atrymajuć staršynia Prezidyuma NAN, jaho namieśniki i hałoŭny vučony sakratar. Staršynia Prezidyuma taksama atrymaje paŭnamoctvy pryznačać i vyzvalać ad pasad kiraŭnikoŭ padparadkavanych arhanizacyj, ich namieśnikaŭ i vučonych sakrataroŭ.
Paŭnamoctvy Prezidyuma i jaho biuro pašyrać za košt pieradačy im častki funkcyj Ahulnaha schodu. Heta pavinna dazvolić chutčej prymać rašeńni, źviazanyja ź dziejnaściu Akademii navuk. Akramia taho, z ulikam aptymizacyi budzie vyznačanaja maksimalnaja štatnaja kolkaść aparatu NAN.
Źmienicca i paradak vybaraŭ sapraŭdnych členaŭ Akademii navuk — akademikaŭ — i členaŭ-karespandentaŭ. Dla kandydataŭ uviaduć dadatkovyja kryteryi acenki navukovych dasiahnieńniaŭ i ŭzrostavyja abmiežavańni na momant vyłučeńnia: da 70 hadoŭ dla akademikaŭ i da 60 hadoŭ dla členaŭ-karespandentaŭ.
Kandydaty pavinny buduć mieć navukovuju stupień doktara navuk i vučonaje zvańnie prafiesara, kiravać navukovymi, navukova-techničnymi i halinovymi prahramami, a taksama mieć značny ŭkład u raźvićcio navuki i navukovyja dy praktyčnyja raboty pa zajaŭlenaj śpiecyjalnaści.
Akramia taho, Łukašenka atrymaŭ prava svaimi ŭkazami prysvojvać akademičnyja zvańni asobam, jakija zrabili značny ŭkład u raźvićcio nacyjanalnaj ekanomiki, biełaruskaj i suśvietnaj navuki.
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary
Adamkie Dyravu?