«Pahladzim, što skaža Pucin». Uitkaf lacić u Rasiju, kab abmierkavać novyja mirnyja prapanovy, vyłučanyja na sustrečy ź Zialenskim u Osła

U sieradu śpiecyjalny pradstaŭnik prezidenta ZŠA Styŭ Uitkaf znoŭ adpraŭlajecca ŭ Rasiju, kab pravieści pieramovy ab zakančeńni vajny va Ukrainie. Jaho vizit adbudziecca na nastupny dzień paśla sustrečy z Uładzimiram Zialenskim u Osła, kudy ŭkrainski prezident pryvioz niejkija novyja prapanovy, jakija Uitkaf pavinien pieradać rasijskim uładam, piša Bi-bi-si.

U aŭtorak Zialenski pravioŭ pieramovy z Uitkafam u Osła. U sustrečy taksama ŭdzielničali premjer-ministr Narviehii Jonas Har Ściore i prezident Finlandyi Alaksandar Stub. Džared Kušnier, jašče adzin śpiecpasłańnik Trampa i jaho ziać, dałučyŭsia da samitu pa videasuviazi.

«U nas jość niekatoryja dakładnyja idei, jak pryjści da miru. My adzinyja z našymi jeŭrapiejskimi partniorami ŭ hetych namahańniach, — skazaŭ Zialenski na pres-kanfierencyi paśla pieramovaŭ u Osła. — My chacieli b, kab amierykancy pryvieźli hetyja idei rasijanam».

Zialenski dadaŭ, što pa-raniejšamu damahajecca praviadzieńnia trochbakovaj sustrečy z udziełam prezidentaŭ Ukrainy, ZŠA i Rasii, dzie, na jaho dumku, možna abmierkavać samyja składanyja pytańni, u tym liku terytaryjalnyja. U Kramli nieadnarazova kazali, što Pucin moža sustrecca ź Zialenskim tolki ŭ Maskvie, ale Ukraina takuju prapanovu adchilaje.

«Adna z važnych idej — pierajści da patencyjnaha trochbakovaha samitu lidaraŭ, kab vyrašyć pytańni, jakija mohuć vyrašyć tolki lidary. Styŭ zaŭtra jedzie ŭ Rasiju. Pahladzim, što skaža Pucin», — skazaŭ učora prezident Ukrainy. Jon nie ŭdakładniŭ, jakija mienavita novyja mirnyja inicyjatyvy abmiarkoŭvalisia ŭ Osła.

Premjer-ministr Narviehii Jonas Har Ściore paćvierdziŭ, što ŭ Osła abmiarkoŭvalisia prapanovy, «nad jakimi pracujuć jeŭrapiejskija i amierykanskija kalehi i jakija, mahčyma, adkryjuć šlach dla sustrečy na ŭzroŭni lidaraŭ».

U aŭtorak mahčymaść praviadzieńnia takoj trochbakovaj sustrečy prakamientavaŭ i Donald Tramp. U adkaz na pytańnie žurnalistaŭ, ci pavinny Zialenski i Pucin asabista padpisać mirnaje pahadnieńnie, jon skazaŭ: «Nie viedaju, mnie zdajecca, im navat nie treba być u adnym pamiaškańni, jany mohuć heta zrabić pa-inšamu. Im ciažka być u adnym pamiaškańni. Mnie ŭsio roŭna, jak heta budzie zroblena».

Pra jakija mienavita prapanovy havorka?

Padčas pres-kanfierencyi ŭ Osła Ściore taksama nie skazaŭ pra sutnaść novych mirnych prapanoŭ, ale apisaŭ koła tem, jakich jany datyčacca.

«Siońnia [učora] my abmierkavali pytańni, źviazanyja ź biaśpiekaj Ukrainy, z płanam roskvitu paśla vajny, z terytoryjami i sankcyjami, a taksama z bolš šyrokaj architekturaj jeŭrapiejskaj biaśpieki».

Uitkaf u pres-kanfierencyi nie ŭdzielničaŭ: jak patłumačyli jaje ŭdzielniki, heta źviazana z tym, što pierad žurnalistami źjavilisia tolki lidary dziaržaŭ.

Adnak krynica Bi-bi-si ŭ amierykanskaj administracyi paviedamiła, što ZŠA acanili pieramovy Zialenskaha z Uitkafam i Kušnieram jak «praduktyŭnyja i kanstruktyŭnyja».

«Ukraina vyłučyła novyja idei i prapanovy, jakija byli padrabiazna abmierkavany. Baki dasiahnuli značnaha prahresu va ŭzhadnieńni pazicyj adnosna skaardynavanaha padychodu da pieramovaŭ z Rasijaj i prasoŭvańnia dypłamatyčnaha pracesu», — paviedamiŭ amierykanski čynoŭnik.

Za minułyja dva hady Uitkaf i Kušnier nieadnarazova jeździli ŭ Rasiju. Apošni taki vizit adbyŭsia ŭ pačatku vieraśnia, paśla čaho abodva śpiecpradstaŭniki prezidenta ZŠA ŭpieršyniu pabyvali ŭ Kijevie.

Zatym Tramp i Pucin sazvanilisia i abmierkavali mahčymyja šlachi zakančeńnia vajny.

Niahledziačy na ŭsiu hetuju dypłamatyčnuju dziejnaść, nijakaha adčuvalnaha prahresu na šlachu da miru dasiahnuć pakul nie ŭdałosia. Rasija praciahvaje nastojvać na vyvadzie ŭkrainskich vojskaŭ z Danbasa, navat z tych jaho rajonaŭ, jakija jana nie zmahła akupavać. Ukraina ličyć heta niedapuščalnym i zajaŭlaje, što za apošnija miesiacy zdoleła vyzvalić niekatoryja zachoplenyja Rasijaj terytoryi.

Jak adznačaje maskoŭski karespandent Bi-bi-si Styŭ Rozienbierh, miarkujučy pa apošnich vystupach i zajavach Pucina, rasijski lidar nie nastrojeny na kampramis i vidavočna choča praciahvać vajnu.

Rasijskija čynoŭniki nieadnarazova kazali pra namier dasiahnuć usich met uvarvańnia, da jakich Maskva adnosiła nie tolki terytaryjalnyja pytańni, ale i palityčnyja sastupki z boku Ukrainy, takija jak źmianieńnie statusu ruskaj movy, admova ad ustupleńnia ŭ NATA i status Ukrainskaj pravasłaŭnaj carkvy, źviazanaj z Maskoŭskim patryjarchatam.

Rezkaje achaładžeńnie pamiž ZŠA i Ukrainaj z-za dyzielnaha paliva

Sustreča ŭ Osła prajšła na fonie rezkaha astudžeńnia adnosin pamiž Zialenskim i Trampam. Pryčynaj stała rašeńnie Vašynhtona zaklučyć ździełku ab pastaŭkach na suśvietny rynak rasijskaha dyzielnaha paliva, a taksama admova Trampa ŭvodzić novyja sankcyi suprać Rasii, praduhledžanyja zakonam imia niabožčyka sienatara Lindsi Hrema.

U svaju čarhu, Ukraina praciahvała nanosić udary pa rasijskich naftapierapracoŭčych zavodach, choć ZŠA nieadnarazova zaklikali jaje hetaha nie rabić.

U Vašynhtonie śćviardžajuć, što takaja paŭza dapamoža źnižeńniu suśvietnych cen na dyzielnaje paliva, choć ekśpierty i ŭkrainskija čynoŭniki nastojvajuć, što nafta i naftapradukty padaraželi z-za vajny ZŠA i Izraila suprać Irana.

Kijeŭ na niekalki dzion pieraryvaŭ ataki na naftavuju infrastrukturu Rasii, ale adnaviŭ ich paśla taho, jak Maskva praciahnuła metanakiravana abstrelvać ukrainskuju enierhietyku.

U apošnija dva tydni Ukraina paviedamiła pra ceły šerah prablem z amierykanskaj vajennaj dapamohaj, u tym liku pra pieraboi z amierykanskimi rańnimi papiaredžańniami ab rasijskich rakietnych udarach, abmiežavańniach pracy spadarožnikavaha internetu Starlink i zatrymkach z pastaŭkami rakiet dla ŭstanovak SPA Patriot.

Donald Tramp taksama zrabiŭ niekalki rezkich zajaŭ u adras Zialenskaha, u tym liku abvinavaciŭ jaho ŭ niežadańni zakančvać vajnu i prapanavaŭ Ukrainie pašukać kahości inšaha, chto moža vieści pieramovy.

Baki vielmi aptymistyčna apisali pieramovy Zialenskaha z Uitkafam i Kušnieram u Osła, adnak krynicy amierykanskaha vydańnia Axios paviedamili, što padčas ich Kušnier praciahvaŭ nastojvać na spynieńni ŭkrainskich udaraŭ pa rasijskich NPZ.

Jak skazana ŭ publikacyi Axios, Kušnier znoŭ nastojvaŭ, što Kijeŭ pavinien pahadzicca na spynieńnie ŭdaraŭ. «Džared kazaŭ vielmi prama», — piša vydańnie. Pavodle infarmacyi Axios, u Vašynhtonie spadziajucca, što Pucin budzie bolš schilny da kampramisaŭ paśla zaklučeńnia dyzielnaj ździełki z ZŠA.

Padčas pres-kanfierencyi ŭ Osła Zialenski prakamientavaŭ situacyju z udarami pa rasijskich NPZ tak: «My prapanavali roznyja varyjanty. My hatovyja nie nanosić udary pa adčuvalnych častkach rasijskaha enierhietyčnaha siektara, kali Rasija spynić bić pa našym siektary. Pucin skazaŭ «nie», ale my šukajem rašeńnie».

U paniadziełak prezident Ukrainy skazaŭ, što Kijeŭ moža prypynić udary pa rasijskich NPZ na 30 dzion, kali ZŠA pradastaviać jamu na hety čas dastatkovuju kolkaść procirakiet dla ŭstanovak SPA Patriot.

«Ciapier heta pracuje»: što adbyvajecca sa Starlink i abmienam raźvieddanymi?

U aŭtorak Zialenski taksama stelefanavaŭsia ź dziaržsakratarom ZŠA Marka Rubia: pavodle jaho słoŭ, razmova była «pradmietnaj» i «ŭ tych pytańniach, jakija majuć značeńnie».

Jany abmierkavali, u pryvatnaści, rakiety-pierachopniki, rannija papiaredžańni ab rasijskich atakach i nieabchodnaść adnavić pracu Starlink i jaho vajennaha anałaha Starshield.

«Udziačny za hatoŭnaść dapamahčy i jasnuju pazicyju», — napisaŭ Zialenski. «Dziakuj, Marka, za kanstruktyŭ! Dziakuj usim u Amierycy, chto padtrymlivaje spraviadlivyja padychody!» — dadaŭ prezident Ukrainy.

Zialenski skazaŭ žurnalistam u Osła, što spadziajecca na adnaŭleńnie narmalnaj pracy spadarožnikavaha internetu «na praciahu 48 hadzin».

Da hetaha ŭkrainskija vajennyja zajavili, što terminały Starlink, ustalavanyja na ruchomych pryładach, pierastajuć pracavać, kali chutkaść ich pieramiaščeńnia pieravyšaje 160 km u hadzinu. Heta pieraškadžaje pracy ŭkrainskich dronaŭ i viertalotaŭ, u tym liku tych, što pierachoplivajuć rasijskija ŭdarnyja bieśpiłotniki.

Akramia taho, prezident Ukrainy zajaviŭ, što Kijeŭ znoŭ svoječasova atrymlivaje raźvieddanyja pra zapusk rasijskich balistyčnych rakiet. Da hetaha Zialenski kazaŭ, što ZŠA niekalki razoŭ nie padali źviestak ab abstrełach, ale amierykanskija ŭłady śćviardžali, što abmien raźvieddanymi idzie ŭ zvyčajnym režymie.

«Kali kazać pra rannija papiaredžańni, jany vielmi važnyja dla našych ludziej, dla našych dziaciej i darosłych, cyvilnych, tamu što my čujem, kali laciać balistyčnyja rakiety, — skazaŭ Zialenski ŭ Osła. — My ŭdziačnyja amierykanskamu boku. Ciapier heta pracuje. Usio vydatna».

• 0
• 0
• 0
• 1
• 0
• 1
• 0
• 0