Махлярам больш не патрэбны ваш пароль. Яны могуць скрасці «лічбавы ключ» і атрымаць доступ да акаўнта нават пры двухфактарнай абароне

Вы ўвайшлі ў інтэрнэт-банкінг, праверылі баланс, аплацілі рахункі і закрылі ноўтбук. А праз некаторы час высвятляецца, што вашым банкаўскім акаўнтам завалодалі махляры, хоць яны не ведалі ні пароля, ні кода пацвярджэння.

Як тлумачаць эксперты, такое магчыма праз крадзеж так званых сесійных cookie-файлаў. Калі чалавек уваходзіць на сайт, той захоўвае на яго прыладзе ўнікальны ідэнтыфікатар, дзякуючы якому «памятае» карыстальніка і не патрабуе паўторнай аўтарызацыі пры пераходзе паміж старонкамі.

«Уявіце сесійны cookie як лічбавы ключ, які ўжо павярнулі ў замку. Калі хакер выкрадзе гэты актыўны файл, ён фактычна становіцца вамі. Яму не патрэбны пароль, ён не выклікае папярэджання пра новы ўваход і часта можа абысці шматфактарную аўтэнтыфікацыю», — тлумачыць тэхнічны дырэктар кампаніі NordVPN Марыюс Брыедзіс.

Паводле яго слоў, cookie-файлы сталі адной з галоўных мішэняў хакераў. За год, які скончыўся ў чэрвені, спецыялісты NordVPN выявілі 52 мільярды cookie-файлаў сярод скрадзеных даных, якія распаўсюджваліся ў інтэрнэце.

Як махляры атрымліваюць доступ да акаўнтаў

Часцей за ўсё cookie крадуць з дапамогай шкоднасных праграм, якія карыстальнік сам, не падазраючы пра небяспеку, усталёўвае на сваю прыладу. Яны могуць хавацца ў праграмах ці пашырэннях для браўзера.

Пасля заражэння шкоднасная праграма знаходзіць у браўзеры актыўныя сесійныя cookie і перасылае іх зламыснікам. Тыя могуць выкарыстаць скрадзены ідэнтыфікатар, каб атрымаць доступ да акаўнта, пакуль сеанс застаецца сапраўдным. Ахвяра пры гэтым можа доўга нічога не падазраваць, бо для яе ўсё выглядае як звычайная праца ў інтэрнэце.

Наступствы залежаць ад таго, які менавіта акаўнт узламалі. Атрымаўшы доступ да электроннай пошты ці сацыяльных сетак, махляры могуць рассылаць паведамленні ад імя ўладальніка і падманваць яго знаёмых. У інтэрнэт-крамах яны могуць змяняць адрасы дастаўкі і выкарыстоўваць захаваныя плацежныя даныя. Атрымаўшы доступ да інтэрнэт-банкінгу, зламыснікі могуць скарыстацца знойдзенай там інфармацыяй, каб выдаваць сябе за ўладальніка рахунку і здзяйсняць махлярства.

Як абараніцца

Спецыялісты раяць перадусім уважліва ставіцца да праграм і пашырэнняў для браўзера, якія вы ўсталёўваеце. Менавіта праз іх на прылады нярэдка трапляе шкоднаснае праграмнае забеспячэнне.

Прыкметамі заражэння могуць быць раптоўнае запаволенне працы камп'ютара ці тэлефона, хуткае разраджэнне батарэі, частыя збоі, нечаканыя перанакіраванні на іншыя сайты або з'яўленне рэкламы і ўсплываючых вокнаў.

Спецыялісты таксама раяць не проста закрываць укладку браўзера, а выходзіць з акаўнта праз кнопку «Выйсці». Само па сабе закрыццё ўкладкі не заўсёды завяршае сеанс, тады як выхад з акаўнта звычайна робіць адпаведны сесійны cookie несапраўдным.

Таксама варта рэгулярна выдаляць cookie-файлы, а для захоўвання пароляў выкарыстоўваць асобны менеджар пароляў.

Калі ёсць падазрэнне, што прылада заражаная, неабходна праверыць яе антывірусам, завяршыць усе актыўныя сеансы ў сваіх акаўнтах і змяніць паролі. Калі заўважылі падазроныя банкаўскія аперацыі, трэба неадкладна звязацца з банкам.

Нягледзячы на тое, што крадзеж сесійных cookie можа дазволіць абысці шматфактарную аўтэнтыфікацыю, спецыялісты ўсё адно раяць яе выкарыстоўваць, бо яна забяспечвае большую абарону, чым адзін толькі пароль.

• 6
• 1
• 2
• 3
• 6
• 0
• 3
• 0