«Tuzin. Unplugged» 6 žniŭnia: Nevma i Akute

6 žniŭnia ŭ Miensku vysadzicca mahiloŭski rok-desant. Hurty Nevma i Akute syhrajuć svaje ekśluziŭnyja prahramy, padrychtavanyja dla prajektu «Tuzin. Unplugged». Stas Mytnik abiacaje praśpiavać šmat novych piesień dy mahčyma pašyryć miežy tryjo, a Daniła Zabeła rychtujecca vykanać pieršuju całkam biełaruskamoŭnuju prahramu, jakaja atrymałasia vielmi intymnaj.

Žyvy Tuzin Uzychodžańnie Akute da viaršyniaŭ biełaruskaha roku pačałosia z prezentacyi pieršaha internet-synhłu «Adzinoctva» na «Tuzinie Hitoŭ» u listapadzie 2009 hodu. Heta była pieršaja pieśnia, napisanaja Romam Žyharavym paśla raspadu hurta «Hluki», jaki tak i nia zdoleŭ realizavać svoj mahutny patencyjał. Ale depresija minuła: za nastupny hod Akute sabrała praktyčna ŭsie mahčymyja rehalii na svaim šlachu: pieramahli ŭ biełaruskim adbory na fest Be2gether, stali pieramožcami «Basovišča» i ŭkrainskaha «Viertifiesta», laŭreatami Graffiti Open Music Fest, a ich «Adzinoctva» trapiła ŭ lik hałoŭnych piesień u biełaruskaj muzycy ŭ 2010 hodzie. Možna z peŭnaściu skazać, što nastupny ich synhł — «Pramiani pt.2 (Sviaci)» sioleta trapić u lik lepšych hitoŭ. Na «Tuzin. Unplugged» vakalist kamandy Stas Mytnik i basist dy aŭtar piesień Raman Žyharaŭ chočuć viarnucca ŭ časy rańniaha Akute, kali jany pa analohii z New Order vykarystoŭvali dram-mašynku Alesis. Ale pryjedzie mahiloŭski hurt poŭnym składam — utroch, razam z bubnačom Paŭłam Fiłatavym. «Mnie samomu nadzvyčaj cikava, što atrymajecca pa vyniku na našym vystupie na „Tuzin. Unplugged“, — kaža Raman Žyharaŭ. — Nie vyklučaju, što my navat pašyrym miežy našaha tryjo». 6 žniŭnia Akute zrobić staŭku na novyja pieśni, ale ŭsimi ŭlubionyja hity buduć taksama. U tym liku «Sviaci», jakaja ŭ svaim akustyčnym varyjancie vyhladaje nia mienš pryvabna, čym u studyjnaj versii.

Bolš intymnaje hučańnie svaich piesień abiacaje hurt Nevma. «Zaraz poŭnaj chadoj rychtujem biełaruskamoŭnuju akustyčnuju prahramu dla „Tuzina“. Pakolki ład budzie pavyšej, to našyja pieśni buduć hučać biez takoha nadryvu, bolš spakojna, pa-chatniamu, a mo navat i pryhažej», — kaža vakalist kamandy, były salist mahiloŭskaj kanservatoryi Daniła Zabeła. Jon abiacaje, što ŭ prahramu abaviazkova ŭvojduć usie pieśni, jakija ŭdzielničali ŭ čarcie na TH. U tym liku i «Ja nia vieru tabie», ź jakoj muzyki zrabili furor na «Basoviščy-2006», kali stali laŭreatami festu i jakaja trapiła ŭ lik hałoŭnych hitoŭ na TH u 2008 hodzie, a taksama «Słoŭnik» ź letašniaha biełaruskamoŭnaha maksy-synhłu hurta.

Vieści imprezu budzie Aleh Chamienka, niaźmienny viadučy radyjoversii hit-paradu «Tuzin Hitoŭ», jakaja idzie na chvalach «Radyjo Racyja».

Kancert «Tuzin. Unplugged» padtrymlivaje hramadzkaja kampanija «Budźma biełarusami».

Kancert pačniecca ŭ 19:00 6 žniŭnia (subota) ŭ mienskim klubie «Hrafici» (zav. Kalinina, 16).

Infalinija: (029) 638-44-44, (033) 638-44-44, skype, google: Diskoteq, ICQ: 531-07-353

• 0
• 0
• 0
• 0
• 0
• 0
• 0
• 0