U Manholii ŭviali prodaž paliva pa cotnych i niacotnych numarach aŭtamabilaŭ. Krainie adhukajecca zaležnaść ad Rasii
U Manholii z 4 žniŭnia ŭvodziacca abmiežavańni na prodaž paliva ŭ zaležnaści ad cotnaści dziaržaŭnych numarnych znakaŭ aŭtamabilaŭ. Takaja miera budzie dziejničać da 15 žniŭnia.
Jak paviedamiŭ ministr pramysłovaści i minieralnych resursaŭ Manholii Hanbałdyn Damdyńniam, padčas adnaho naviedvańnia zapraŭki možna budzie nabyć paliva nie bolš čym na 50 tysiač tuhrykaŭ (kala 13,9 dalaraŭ).
Abmiežavańni buduć dziejničać z 4 pa 15 žniŭnia. U cotnyja daty zapravicca zmohuć mašyny z numarami, jakija pačynajucca na 0, 2, 4, 6 i 8, u niacotnyja — na 1, 3, 5, 7 i 9.
Pavodle słoŭ ministra, abmiežavańni ŭviedzienyja dla taho, kab bolš raŭnamierna raźmierkavać najaŭnyja zapasy naftapraduktaŭ pamiž spažyŭcami.
Ułady Manholii adznačajuć, što kraina mieła zapasaŭ paliva prykładna na miesiac spažyvańnia, ale popyt na naftapradukty štohod pavialičvajecca ŭ siarednim na 14%.
Kab u budučyni paźbiehnuć padobnych situacyj, u krainie płanujecca budaŭnictva 22 novych reziervuaraŭ i schoviščaŭ dla naftapraduktaŭ. U 2026 hodzie manholskija ŭłady chočuć stvaryć dadatkovyja mahutnaści dla zachoŭvańnia zapasaŭ na 15 dzion spažyvańnia, u 2027 hodzie — na miesiac, a da 2028 hoda — na try miesiacy. U dalejšym płanujecca davieści abjom reziervaŭ da ŭzroŭniu šaścimiesiačnaha spažyvańnia.
Akramia taho, Manholija damoviłasia z Paŭdniovaj Karejaj ab imparcie 20 tysiač ton dyzielnaha paliva, 20 tysiač ton aŭtamabilnaha bienzinu i 6 tysiač ton avijacyjnaha paliva. Pryvatnyja kampanii taksama praciahvajuć zaklučać kantrakty na pastaŭki naftapraduktaŭ.
Ciapier Manholija ŭ spravie zabieśpiačeńnia palivam nadzvyčaj zaležyć ad Rasii. Niahledziačy na toje, što ŭ krainy jość ułasnyja radoviščy nafty, kraina dahetul nie maje nijakich mahutnaściaŭ dla jaje pierapracoŭki. U vyniku zdabytaja nafta ekspartujecca ŭ Kitaj, a hatovyja pradukty impartujucca z Rasii. U apošniaj nabyvajecca kala 80—90% usich śvietłych naftapraduktaŭ (bienzin, dyzielnaje paliva, avijacyjnaje paliva, zvadkavany haz).
U vyniku lubyja zatrymki ci pieraboi z pastaŭkami z boku Rasii, a taksama źmieny cen na paliva adrazu paralizujuć hornazdabyŭnuju halinu (jakaja spažyvaje vielizarnuju kolkaść dyzielu), transpart i sielskuju haspadarku.
Ciapier čytajuć
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić18
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić
I pra realnych bandytaŭ, i pra kryvarukaha Kościu-plitačnika, i pra seks u ciahniku. Žurnalistka z Homiela napisała knihu — čytać jaje strašna i śmiešna55
Kamientary