Viasioły tyranazaŭr i inšyja cacki
Unačy ažyvajuć ekspanaty Muzeja naturalnaj historyi. Škilet tyranazaŭra haniajecca za kostkaj, cacačnyja rymskija lehijanery bjucca z kaŭbojami Dzikaha Zachadu, a stod z vostrava Paschi patrabuje žujki.
Noč u muzei (Night at the Museum)
ZŠA, 2006, kalarovy, 107 chv.
Režyser: Šon Levi
Roli vykonvajuć: Ben Styler, Robi Ŭiljamz, Dyk Van Dajk, Miki Runi, Džejk Čery, Bił Kobz
Žanr: Kamedyja dla siamiejnaha prahladu
Adznaka: 5 (z 10)
U niedareki Łary ŭsio składvajecca błaha: zhubiŭ pracu, raźviedzienaja žonka adchilaje jaho ad syna, a sam syn hanarycca ajčymam-brokieram.
Apošnim šancam Łary stanovicca praca… načnoha vartavoha ŭ Muzei naturalnaj historyi. Unačy ekspanaty muzeju ažyvajuć i pačynajecca takoje…
Karcina Šona Levi – idealnaja kamedyja dla dziaciej. Dyj sam darosły hieroj viadzie siabie, jak hareźlivaje dzicia, jakomu treba znajści ahulnuju movu sa škiletam tyranazaŭra, nakarmić stoda z Paschi žujkaj i dać stratehičnaje zadańnie cacačnym rymskim lehijaneram.
Zvyčajna ekspanaty ažyvali ŭ karcinach žachaŭ (varta pryhadać šmatlikija “Muzei vaskovych fihuraŭ”). Henaja – kamedyja, hałoŭnyja pryłady jakoj ucioki, vyśpiatki, hrymasy – i inšyja pryhody ŭ kampanii sa lvami, Atyłaj, vikinhami, najškadliviejšaj małpaj i zabranzaviełym Kalumbam.
Ben Styler (“Znajomstva z Fakierami”) – padaje, skača, aburajecca, dahaniaje – i chacia bolej składanych zadačaŭ filmam nie praduhledžana, dla dziciačaha kino heta samaje to. Robin Ŭiljamz, jaki ŭžo traplaŭ u nierat z karcinaju “Džumandžy” – tut źjaŭlajecca vaskovaju statujaj Teadora Ruzvelta, jaki daje hieroju kaštoŭnyja parady j dapamahaje jamu z naviadzieńniem paradku.
A budzie šče čaroŭny ehipiecki artefakt (hałoŭnaja pryčyna ažyŭleńniaŭ), badzioryja staryja rabaŭniki – i bujnaja radaść syna Łary.
Paśla stužki amerykancy šturmujuć Muzej naturalnaj historyi, a zali poŭniacca hledačami.
U Miensku z 12 studzienia 2007 h.
Kamientary