Biełaruskaja hłybinia. Uśmieška Vaśkoviča

Byvała, uśmichnusia im —
jany nie vierać,
i śviatła tvaru majho
Jany nie azmročvali.
Joŭ 29:24

Jaŭhiena Vaśkoviča viedajuć usie babulki ŭ rajonie. «Naš Ženia!» Kali siabry BCHD paŭtara hoda tamu abychodzili babrujskija vulicy Minskuju dy Kastryčnickuju, mnie samomu stała cikava, čamu 21-hadovy biełaruskamoŭny aktyvist-pačatkoviec karystajecca takoj papularnaściu siarod «elektarata». Akazałasia — elemientarna, Vatsan:

Jaŭhien pry sustrečy zaŭsiody ŭśmichajecca i vitajecca navat ź nieznajomymi — šyroka, adkryta i, hałoŭnaje, ščyra.

Uśmiešlivy Jaŭhien pracavaŭ sabie žurnalistam u «Babrujskim kurjery», jak chadecki narodny deputat źbiraŭ podpisy za dobraŭparadkavańnie svajho rajona — i adnojčy byŭ žorstka źbity miascovaj milicyjaj padčas chakiejnaha matču ŭ padtrybunnym pamiaškańni ladovaha pałaca za toje, što ŭźniaŭ bieł-čyrvona-bieły ściah.

Kali mianie ŭ Minsku vyzvalali ŭ zale suda dla «chimii», daviedaŭsia, što Jaŭhiena Vaśkoviča sudziać za napad na babrujskuju ŭpravu KDB.

U noč z 16 na 17 kastryčnika 2010 babrujskija chłopcy ŭtroch zakidali budynak rajonnaha adździeła KDB butelkami z zapalnaj sumieśsiu. Aficyjnyja straty skłali 253 tysiačy biełaruskich rubloŭ, ale abvinavačvańnie zajaviła: raz chacieli spalić usio — ličym za škodu košt usioj kantory, 2 miljardy.

Doŭha nie moh uciamić, jak juny, abajalny, uśmiešlivy katalik špurlaje kaktejl Mołatava razam z anarchistami. Dastać jano, kaniečnie, dastała — ale treba razumieć, što taki ŭčynak raŭnavartasny strełu «Aŭrory». Heta vajna, u tym liku i z samim saboj.

U sudzie Jaŭhien Vaśkovič trymaŭsia hierojem, pa-kalinoŭsku. Bieł-čyrvona-biełaja majka. Raspraŭlenyja plečy. I, kaniečnie, uśmieška.

Siem hadoŭ uzmocnienaha režymu.

Advakat, jaki ŭpieršyniu naviedvaŭ Vaśkoviča ŭ turmie, byŭ u šoku ad badzioraha nastroju schudniełaha Jaŭhiena. «Dumaŭ, braviruje, — pryznaŭsia jon paśla, — a potym hladžu, jon tak žyvie».

U adkaz na piać maich dasłanych listoŭ dajšoŭ adzin. Zatoje jaki! «Uśmichajusia ŭsim — i viaźniam, i kanvairam. I jany pačynajuć uśmichacca ŭ adkaz». Radki prosta pramieniać. Ja naprykancy — łacina: «Z Boham da ŭsiaho hatovy». Pieršaje, za što Vaśkovič atrymaŭ karcar, — admova addać kanvairam Bibliju.

Pišu Jaŭhienu, što my pieramožam biez hvałtu — tak, jak heta rabili našy prodki, susiedzi, jeŭrapiejcy, tak, urešcie, jak heta zrabiŭ Isus. Vaśkoviču dachodzić moj kanviert, a ŭsiaredzinie — čysty arkuš z nadpisam: «Pierapiska ź Sieviaryncam zabaronienaja».

Dla tych, kamu pierapisku z Vaśkovičam jašče nie zabaranili, jość adras: 212011, Mahiloŭ, vuł.Krupskaj, 99a, turma №4.

Pravaabaroncy razmaŭ-lajuć pra Vaśkoviča nieachvotna — sam pryznaŭsia ŭ hvałcie. Ale — paradoks: patrabavańnie svabody Vaśkoviču robić nas samich volnymi, asudžeńnie ci abyjakavaść (maŭlaŭ, viedaŭ, na što išoŭ) robić nas rabami hvałtu, jaki čynić režym.

Uvohule, svaboda i hvałt niesumiaščalnyja. Voś čamu biełarusy damahlisia niezaležnaści nie ŭ vyniku zbrojnych paŭstańniaŭ XIX stahodździa, a paśla duchovych i kulturnych adradžeńniaŭ XX stahodździa.

Zazvyčaj tyja, chto kidaje butelku z ahniom, zakryvajuć tvar. Kab nie paznali i kab nie bačyli złości, ad jakoj pierakošvaje abličča.

Jaŭhien Vaśkovič tvaru nie chavaje. Jon uśmichajecca. I ŭśmieška Vaśkoviča-Karnehi robić značna bolš, čym zapalny kaktejl Mołatava-Vaśkoviča.

Za parušeńnie režymu ŭtrymańnia Jaŭhienu Vaśkoviču pryznačyli 3 hady krytaj turmy — paŭhałodnaj izalacyi i poŭnaj biezabaronnaści.

Ale jon uśmichajecca. Dumaju, heta śviedčańnie biblijnych słovaŭ: «Nie budź pieramožany złom, a pieramahaj zło dabrom» (Da Rymlanaŭ 12:21)

Trymajsia, naš Ženia!

My vierym. My možam. A značyć, my pieramožam — biełaruskim słovam i dobraj spravaj, volaj i nadziejaj, uśmieškaj i luboŭju. Tak, jak dźvie tysiačy hadoŭ tamu pieramoh Sam Boh.

Hladzi jašče:

Bkłaruskaja hłybinia. Viskuli

Biełaruskaja hłybinia. Paparać-ludzi

Biełaruskaja hłybinia. Šeśćsot tamoŭ Krašeŭskaha

Biełaruskaja hłybinia. Karani ŭ kryvi

Biełaruskaja hłybinia. Pad sercam Jeŭropy

Biełaruskaja hłybinia. Udych.

Biełaruskaja hłybinia. Siem synoŭ Jova

Biełaruskaja hłybinia. Častka I

Biełaruskaja hłybinia. Kamienda

Biełaruskaja hłybinia. Łastaŭki ŭ stresie

Biełaruskaja hłybinia. Pieraŭtvareńnie Hospada

• 0
• 0
• 0
• 0
• 0
• 0
• 0
• 0