З'явіўся саўндтрэк да фільма «Жыве Беларусь»: Вольскі геніяльны, як заўжды
У Сеціве з'явіўся саўндтрэк да фільма «Жыве Беларусь». Песню «Краіны няма» напісаў Лявон Вольскі. Фільм «Жыве Беларусь» стане першай паўнаметражнай стужкай аб нашай краіне, якую пабачыць сусветны глядач. Стужка ў мастацкай форме апавядае пра нацыянальна-вызвольны рух у Беларусі.
Для генерала краіна — вайна.
Для нефармала краіна — чума.
Для радыкала краіна — турма.
Але для большасці краіны няма.
Для панславіста краіна — адна.
Для сатаніста краіна — труна.
Для гітарыста краіна — струна.
Але для большасці краіны няма.
Вярні жыццё сваёй краіне,
Яна ў сне халодным гіне!
Вярні жыццё сваёй зямлі,
Яе сівыя снягі замялі.
Для нелегала краіна — зіма.
Для адмірала краіна — карма.
Для выкідалы краіна — карчма.
Але для большасці краіны няма.
Вярні жыццё сваёй краіне,
Яна ў сне халодным гіне!
Вярні жыццё сваёй зямлі,
Яе сівыя снягі замялі.
Вярні жыццё сваёй краіне,
Яна ў сне халодным гіне!
Вярні жыццё сваёй зямлі,
Масты спалі і зямлю асвятлі.
Стужка заснаваная на рэальных падзеях, пераасэнсаваных сцэнарыстамі, каб гісторыя беларускага юнака-музыкі стала зразумелая на ўсіх кантынентах.
Над фільмам працавалі Польская дзяржаўная кінастудыя мастацкіх і дакументальных фільмаў (WFDIF) і французскі Canal+. Сусветны дыстрыбуцыяй фільма «Жыве Беларусь» займаецца італьянская кампанія Intramovies. Viva Belarus — так будзе гучаць назва фільма ў сусветным пракаце. 19 красавіка фільм выйдзе ў Польшчы. Улетку запланаваны выхад кіно на тэлебачанні.
Рэжысёр фільма — Кшыштаф Лукашэвіч, адзін са сцэнарыстаў — беларускі актывіст і журналіст Франак Вячорка. Акурат ягоная гісторыя службы ў войску легла ў аснову сюжэта. Галоўны герой фільма — рок-музыка Мірон, гурт якога трапляе ў «чорны спіс», а сам ён — у войска. Яго допісы ў інтэрнэт-блогу, дзе ён раскрывае цёмныя бакі жыцця ў казарме, выклікаюць «вэб-рэвалюцыю». Ролю рок-музыкі Мірона Захаркі выканаў рэпер Зміцер (Вінцэнт) Папко. Народжаны ў Івацэвіцкім раёне, ён вучыўся ў БДУ на журфаку, а пасля выбраў мастацкую кар'еру.
У фільме зняліся таксама акцёры Дзяніс Тарасенка, Алесь Малчанаў, Раман Падаляка, Анатоль Кот, шоўмэн Аляксандр Памідораў, польская зорка Караліна Грушка выконвае галоўную жаночую ролю.
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»23
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары