Фінансавы махляр Марсалек, які мог быць у Беларусі, перабраўся ў Расію
Былы топ-менеджар нямецкай Wirecard Ян Марсалек знаходзіцца ў Расіі, сцвярджае газета Handelsblatt са спасылкай на крыніцы. Выданне удакладняе, што перабрацца ў краіну яму дапамагла расійская ваенная разведка, паведамляе РБК
Handelsblatt нагадвае пра расследаванне Spiegel і Bellingcat, якія высветлілі, што Марсалек пасля ад'езду з Аўстрыі 18 чэрвеня здолеў дабрацца да Мінска. Аднак, па дадзеных Handelsblatt, ён не застаўся ў сталіцы Беларусі. Па версіі выдання, ГРУ (так у матэрыяле называюць Галоўнае ўпраўленне Генштаба ВС Расіі) праз расійска-беларускія палітычныя рознагалоссі вырашыла пераправіць Марсалека ў прыватны дом у Падмаскоўі.
Выданне сцвярджае, што ў Расіі Марсалек валодае значнымі сродкамі ў біткойнах, якія вывеў з Дубая.
Пры гэтым газета паказвае, што падчас працы ў Wirecard Марсалек у размовах з іншымі бізнэсоўцамі казаў, што нібыта кантактаваў з расійскай вайсковай разведкай, наведваў сірыйскую Пальміру, Лівію і Чачню. Bellingcat сцвярджае, што Марсалек 60 разоў заязджаў на тэрыторыю Расіі.
Сам Марсалек заяўляў і пра свае сувязі з брытанскімі спецслужбамі. Як паведамляла Financial Times, падчас перамоваў топ-менеджар Wirecard выхваляўся тым, што ў яго ёсць вынікі расследавання замаху на экс-супрацоўніка ГРУ Сяргея Скрыпаля ў брытанскім Солсберы, дзе, як сцвярджаюць у Лондане, было ўжытае атрутнае рэчыва «Навічок».
Марсалек знік пасля таго, як Wirecard, якая выпускала крыптавалютныя карты, падала заяву аб банкруцтве. Як высветлілася, на рахунках кампаніі не аказалася амаль $2,1 млрд (каля €1,9 млрд), хоць раней лічылася, што гэтыя грошы там ёсць.
22 чэрвеня нямецкая пракуратура арыштавала кіраўніка Wirecard Маркуса Браўна. Быў выдадзены ордар і на арышт Марсалека, але той паспеў збегчы.
Цяпер чытаюць
«Забралі яго. Не кінеш жа, усё ж такі наш чалавек». Лукашэнка выказаўся пра Статкевіча17
«Забралі яго. Не кінеш жа, усё ж такі наш чалавек». Лукашэнка выказаўся пра Статкевіча
«У выніку ён сказаў мне: «Хопіць мяне шантажаваць, я хачу палюбавацца гэтымі дрэвамі». Аксана Колб расказала, пра што размаўляла са Статкевічам на мяжы88
Каментары