Пляменніцу аяталы Хаменеі арыштавалі пасля таго, як яна заклікала замежныя ўрады разарваць сувязі з Тэгеранам
Пляменніца Вярхоўнага лідара Ірана аяталы Алі Хаменеі, праваабаронца Фарыдэ Марадхані была арыштаваная пасля таго, як заклікала міжнародную супольнасць разарваць усе сувязі з Тэгеранам у сувязі з жорсткім падаўленнем пратэстаў, выкліканых смерцю 22-гадовай Махсы Аміні.
Яе брат, Махмуд Марадхані паведаміў, што Фарыдэ была арыштаваная ў сераду, калі звярнулася ў пракуратуру.
Фарыдэ Марадхані ў відэазвароце, апублікаваным яе братам, заклікала сусветную супольнасць разарваць сувязі з іранскім рэжымам на фоне пратэстаў, якія ахапілі краіну, і «спыніць перамовы з Тэгеранам».
«Свабодныя людзі, далучайцеся да нас і скажыце свайму ўраду, каб ён спыніў падтрымліваць гэты рэжым, які забівае дзяцей», — сказала Марадхані на відэа. «Гэты рэжым не верны ніводнаму са сваіх рэлігійных прынцыпаў і не прытрымліваецца ніякіх правілаў, акрамя жадання застацца ва ўладзе».
Яна заявіла, што іранцы знаходзяцца ў стане вайны з тымі, хто падтрымлівае іранскія ўлады, і заклікала дэмакратычныя краіны адклікаць сваіх прадстаўнікоў з Ірана і выслаць іранскіх прадстаўнікоў са сваіх краін.
Нябожчык, бацька Фарыдэ і Махмуда Марадхані быў святаром і вядомым дзеячам апазіцыі, ён быў жанаты на сястры Вярхоўнага лідара Ірана Бадры Хасейні Хаменеі.
Пратэсты ў краіне пачаліся ў сярэдзіне верасня пасля гібелі Махсы Аміні. Улады заявілі, што ў дзяўчыны здарыўся інсульт у паліцэйскім участку, калі яна была арыштаваная за няправільнае нашэнне хіджаба. Калі яе даставілі ў бальніцу, яна ўпала ў кому і пазней памерла.
За два месяцы пратэстаў у Іране былі забітыя 60 супрацоўнікаў сіл бяспекі, 450 пратэстоўцаў, у тым ліку 63 дзіцяці, 18 173 чалавекі былі арыштаваныя.
Цяпер чытаюць
У Мінску масажыст Андрэй таемна здымаў голых кліентак27
Каментары