Рэжысёр Роб Маршал зрабіў сваю інтэрпрэтацыю казкі дацкага пісьменніка Ганса Хрысціяна Андэрсена і вядомага дыснэеўскага мультфільма 1989 года. Атрымаўся анімацыйны баявік з героямі розных колераў скуры і нацыянальнасцяў.
Новая «Русалачка» пачалася са скандальнага выбару на галоўную ролю цемнаскурай спявачкі Холі Бэйлі. Вонкавыя адрозненні Бэйлі ад арыгінальнага персанажа з блакітнымі вачыма і светлай скурай выклікалі пратэст у карыстальнікаў інтэрнэту. З'явілася чарада негатыўных публікацый з хэштэгамі #NotMyAriel і #NotMyMermaid.
Аднак выбар Холі Бэйлі на галоўную ролю, як і яе ігра, адна з найлепшых рэчаў у гэтым фільме. Акцёры другога плану таксама на вышыні. Тэхнічная каманда вельмі добра перадала плаванне герояў у падводным царстве: сачыць за візуальнымі эфектамі, якія суправаджаюць плаванне персанажаў, бясконца захапляльна.
Калі вы забыліся, што дзеецца ў сюжэце, сцісла нагадаем: русалачка Арыэль прагне адкрыць для сябе свет над морам. Яна збірае рэчы, якія падаюць у акіян зверху, і ўвесь час моліць свайго бацьку, караля, дазволіць ёй даследаваць зямлю. Кароль Трытон супраць усяго, што звязана з людзьмі, бо яго жонка была імі забітая. Насуперак волі бацькі Арыэль заключае здзелку з марской вядзьмаркай Урсулай, паводле якой абмяняе свой голас на чалавечыя ногі, каб адкрыць для сябе свет наверсе і ўразіць маладога прынца, якога яна калісьці дапамагла выратаваць.
Аднак шматрасавая і мультыкультурная версія далёка адышла ад першапачатковай крыніцы 1837 года — дацкай казкі, напісанай Гансам Хрысціянам Андэрсенам. Міжрасавая сумесь сясцёр і ўсяго акцёрскага складу, адсылкі да жаночай самадастатковасці — усё кажа само за сябе. Гэта новая норма.
Але ці мае сэнс мультыкультурнасць у дачыненні да самога сюжэта? Ці пераасэнсоўваецца ўжо вядомая нам гісторыя ў нейкім новым рэчышчы? Тут адказ, хутчэй, не.
Пытанні крытыкаў выклікала таксама адмова ад антрапаморфных рыс такіх герояў, як краб Себасцьян і рыбка Флаўндэр, — яны набліжаныя да рэальных жывёл і праз гэта, на жаль, як быццам страцілі сваю пераканаўчасць. У дадатак «падводныя эпізоды» «Русалачкі» выглядаюць празмерна «падводнымі»: яны атрымаліся вельмі цьмяныя, хоць, магчыма, разлічаныя на пэўную якасць экрана ў кінатэатры. Але ж не ўсе будуць глядзець гэты фільм у кіназале.
Новай «Русалачцы» бракуе сапраўднай магіі, непадробленай весялосці і рызыкоўнасці, уласцівых папярэднім версіям. Аднак пры гэтым гэта візуальна добры фільм з моцным акцёрскім складам, ён напоўнены дастатковай колькасцю смеху, каб спадабацца дзецям, і не даць засумаваць дарослым.
Чытайце яшчэ:
У Disney стварылі штучны інтэлект, які лёгка «малодзіць» або «старыць» акцёраў
Памёр французскі бізнэсмен, які стаў прататыпам галоўнага героя фільма «1+1»
83-гадовы Аль Пачына запатрабаваў ад 29-гадовай каханай тэст на бацькоўства
Каментары