17-гадовага сваяка Якуба Коласа асудзілі за ўдзел у «экстрэмісцкім фармаванні»
У Мінскім абласным судзе вынеслі прысуд 17-гадоваму жыхару Стаўбцоўскага раёна Мікіту Брую, якога абвінавацілі ў наўмысных дзеяннях па рэабілітацыі нацызму і садзейнічанні экстрэмісцкай дзейнасці (ч. 1 арт. 130-1, ч. 1 і ч. 2 арт. 361-1 КК). Суддзя Вікторыя Паляшчук прызначыла хлопцу тры гады пазбаўлення волі з адбываннем у выхаваўчай калоніі, паведамляе «Вясна».
У лістападзе 2022 года дзяржканалы паведамілі аб затрыманні пяцярых удзельнікаў закрытага чата «Саюз беларускага нацыянальнага шчыта» (СБНШ), прызнанага «экстрэмісцкім фармаваннем». Адзін з затрыманых, акурат Мікіта Бруй, тады расказаў на камеру, што ўступіў чат па запрашэнні знаёмага, а задачай групы была падрыхтоўка да «будучай партызанскай вайны».
Мікіта Бруй — стрыечны праўнук народнага пісьменніка Беларусі Якуба Коласа, вучыўся ў сярэдняй школе ў вёсцы Мікалаеўшчына. Ягоная прабабуля — родная сястра Якуба Коласа Марыя Бруй.
За два тыдні да затрымання дзяржаўныя медыя рабілі пра Мікіту матэрыял. Ён тады распавёў, як рыхтуецца да 140-гадовага юбілею з дня народзінаў Якуба Коласа:
«Кожны год у лістападзе ў час «Каласавін» я, як стрыечны праўнук Якуба Коласа, больш чым калі думаю пра свайго знакамітага родзіча, асэнсоўваю прачытаныя творы, распытваю ў маці, што яна памятае з дзяцінства, чутае ад бабулі Марыі — малодшай сястры паэта.
Заўжды дома пануе святочны настрой: я раскладваю на сваім стале кнігі, гартаю «Новую зямлю» і міжволі ва ўяўленні малююцца пейзажы роднага краю, які любіў Якуб Колас, і які праз ягоныя творы палюбіў я».
Каментары