Блогер Лёня Пашкоўскі правёў 24 гадзіны ў метро Нью-Ёрка

Лёня Пашкоўскі, вядомы ютуб-праектам «Хачу дадому», правёў 24 гадзіны ў метро Нью-Ёрка, каб вывучыць горад з нечаканага боку. Мясцовае метро — гэта цэлы свет, у якім перасякаюцца ўсе сацыяльныя пласты горада: багатыя і бедныя, бяздомныя і трэйдары з Уол-Стрыт, усе нацыі і прафесіі.

Зайцы ў метро і як перац чылі дапамог у барацьбе з імі

Кошт білета на адну паездку ў нью-ёркскім метро складае 2,75 даляра. Безлімітны праязны на месяц каштуе 140 даляраў. Метро працуе кругласутачна. Як распавёў Пашкоўскі, на знак пратэсту людзі, якія лічаць, што паездка ў такіх умовах столькі не каштуе, праходзяць бясплатна. Па яго назіраннях, кожны пяты пранікае ў метро бясплатна рознымі спосабамі: пераскоквае цераз турнікет, пралазіць пад ім, праходзіць разам з другім пасажырам па адной аплаце. Яшчэ адзін спосаб увайсці — скарыстацца дзвярыма для выхаду ў час, калі выходзяць людзі з цягніка, які прыехаў.

Згодна з афіцыйнай статыстыкай, кожны дзень з пяці мільёнаў пасажыраў 400 тысяч едуць зайцамі. На гэтым метро губляе больш за мільён даляраў за дзень.

Некалькі дзесяцігоддзяў таму для ўваходу ў метро выкарыстоўваліся жэтоны. Блогер распавядае, як у той час людзі праходзілі бясплатна:

«Яны запіхвалі ў адтуліну для прыёму жэтонаў абгорткі ад доўгіх жуек-пласцінак. Гэта не дазваляла жэтону глыбока правальвацца. А потым губамі гэты жэтон высмоктвалі назад. Каб з гэтым змагацца, работнікі метро ў адтуліны сыпалі перац чылі. Калі людзі спрабавалі высмактаць жэтон, то атрымлівалі добрую дозу перцу».

Выгляд станцый: пацукі, пах мачы і эклектыка

Пашкоўскі адзначае, што метро Нью-Ёрка вельмі бруднае. На кожнай станцыі знайшлі прытулак бамжы. На рэйках — горы смецця, якое пастаянна загараецца. Праз гэта зачыняюцца станцыі, затрымліваюцца цягнікі. «Цягнікі ўвогуле не ходзяць згодна з раскладам, і ты пастаянна затрымліваешся дзесьці ў тунэлі, можаш прастаяць і гадзіну. Гэта адбываецца кожны дзень. У гэтым метро нічога не працуе нармальна», — дзеліцца назіраннямі блогер.

Шмат станцый метро Нью-Ёрка пабудавана больш за сто гадоў таму (метро ў горадзе пачало працаваць у 1868 годзе). Самі станцыі выглядаюць вельмі занядбанымі. Шмат дзесяцігоддзяў іх ніхто не рамантаваў.

«Атрымліваецца такая эклектыка. У аздабленні станцый засталося шмат старых дэталяў, якія сведчаць пра тое, што некалі гэтае месца выглядала прыгожа і дорага. Шмат мастацтва. У той жа час гэта ўсё вельмі старое і агідна бруднае. Бегаюць пацукі. Усё смярдзіць мачою і дзярмом», — кажа блогер.

Але ў метро ёсць і сучасныя чыстыя і акуратныя станцыі, якія, паводле слоў блогера, нагадваюць станцыі Мінскага метрапалітэна. На некаторых станцыях ёсць установы, дзе можна паесці, не выходзячы з метро. На такіх станцыях можна знайсці і бясплатную прыбіральню.

У выпуску Пашкоўскі таксама гутарыць з мясцовымі і каштуе фаст-фуд, які прадаюць у падземцы.

Чытайце яшчэ:

15-секунднае відэа з мінскага метро шакавала амерыканцаў. Твіт з ім сабраў 5 мільёнаў праглядаў

Мінскі метрапалітэн пакажа начное жыццё падземкі

Беларускі ютуб-блогер Пашкоўскі выдаў рэпартаж пра Украіну

Беларускі блогер-падарожнік Лёня Пашкоўскі: Мы гатовыя стаць грамадзянамі прагрэсіўнага грамадства, а не беднай афрыканскай дыктатуры

• 11
• 0
• 2
• 2
• 5
• 2
• 7
• 0