Уначы быў нанесены ўдар па суднабудаўнічым заводзе ў Севастопалі. Гіганцкі пажар
На заводзе будуюць і рамантуюць караблі Чарнаморскага флоту Расіі.
Кіраўнік акупацыйных уладаў Севастопаля Міхаіл Разважаеў паведаміў, што ракетны ўдар гэтай ноччу быў нанесены па суднабудаўнічым заводзе, а таксама расказаў, што ў выніку ўдару пацярпелі, паводле папярэдніх даных, 24 чалавекі, піша Бі-бі-сі. Апошнюю лічбу праверыць немагчыма.
«Знаходжуся на месцы пажару на паўднёвай пляцоўцы Севастопальскага марскога завода. Усе аператыўныя службы працуюць на месцы, ніякай небяспекі для цывільных аб'ектаў у горадзе няма», — напісаў Разважаеў у сваім тэлеграм-канале.
Сеўмарзавод — гэта суднабудаўнічы Севастопальскі марскі завод імя Сярго Арджанікідзэ, на якім будуюць і рамантуюць караблі Чарнаморскага флоту Расіі.
Паводле слоў Разважаева, з 24 пацярпелых чацвёра знаходзяцца ў стане сярэдняй цяжкасці.
На некалькіх відэа, апублікаваных карыстальнікамі сацсетак з Севастопаля, відаць, што на тэрыторыі завода адбылося як мінімум тры магутныя выбухі.
Мінабароны Расіі заявіла, што ўдар па заводзе быў нанесены дзесяццю крылатымі ракетамі, а таксама быў атакаваны трыма безэкіпажнымі катарамі атрад караблёў Чарнаморскага флоту.
Сродкі СПА збілі сем ракет, а патрульны карабель «Васілій Быкаў» знішчыў усе ўкраінскія катары, заявілі ў міністэрстве.
Паводле звестак ведамства, два караблі, якія знаходзяцца на рамонце, «атрымалі пашкоджанні» ў выніку трапляння ракет.
«Яна забрала дзяцей і вярнулася ў Мінск»: гісторыя беларуса, які эміграваў у Барселону з сям'ёй, а застаўся адзін18
Каментары