Сусветныя букмекерскія агенцтвы падзяліліся сваёй статыстыкай фаварытаў на Нобелеўскую прэмію, якую пачалі ўручаць сёння. Паглядзелі, на каго з намінантаў на ўзнагароды па ўмацаванні міру і па літаратуры ставяць.
Так, напрыклад, на сайце агенцтва Oddspedia у спісе фаварытаў на атрыманне Нобелеўскай прэміі міру беларуская дэмакратычная лідарка Святлана Ціханоўская займае другое месца адразу пасля прэзідэнта Украіны Уладзіміра Зяленскага. За імі ідзе расійскі апазіцыянер Аляксей Навальны.
У амерыканскай буйной букмекерскай кампаніі BetUS статыстыка амаль такая ж. Але Ціханоўская тут займае ўжо трэцяе месца пасля Зяленскага і Навальнага.
Што ж да Нобелеўскай прэміі па літаратуры, то ў букмекераў накшталт платформ Nicerodds і Smarkets упэўнена лідзіруе нарвежскі празаік і драматург Юн Фосэ, які вельмі папулярны ў сябе ў краіне, дзякуючы кнігам «Меланхолія», «Трылогія», «Хтосьці збіраецца прыйсці» і іншым.
Следам за ім ідзе венгерскі пісьменнік Ласла Краснахаркаі і кітайская літаратурная зорка Цань Сюэ.
Трэба адзначыць, што прагнозы букмекераў па Нобелеўцы часта не спраўджваюцца.
Як адзначыў агенцтву Reuters Генрык Урдал, дырэктар Інстытута даследавання міру ў Осла, ні Ціханоўская, ні Зяленскі, ні Навальны, хутчэй за ўсё, не атрымаюць Нобелеўскую прэмію міру, бо летась прадстаўнікі Беларусі, Украіны і Расіі ўжо атрымлівалі ўзнагароды.
Аднак, на яго думку, прэмію міру зноў атрымаюць праваабаронцы, «бо ў 75‑годдзе Усеагульнай дэкларацыі правоў чалавека, Нобелеўскі камітэт можа вырашыць асвятліць унёсак праваабарончых актывістаў у мір».
Нагадаем, што летась лаўрэатамі Нобелеўскай прэміі міру сталі праваабаронцы з Беларусі, Украіны і Расіі, а менавіта заснавальнік праваабарончага цэнтра «Вясна» Алесь Бяляцкі, старшыня расійскай праваабарончай арганізацыі «Мемарыял» і кіраўніца ўкраінскага «Цэнтра грамадзянскіх свабод» Аляксандра Мацвяйчук.
На момант уручэння прэміі Алесь Бяляцкі знаходзіўся і працягвае знаходзіцца ў турме з-за масавых палітычных рэпрэсій з боку рэжыму Лукашэнкі, які прайграў прэзідэнцкія выбары ў 2020 годзе і дагэтуль утрымлівае ўладу шляхам запалохванняў і арыштаў дзясяткаў тысяч беларусаў.
Замест Бяляцкага на цырымоніі ўручэння прэміі тады была яго жонка Наталля Пінчук.
Гэта была другая нобелеўская ўзнагарода за гісторыю Беларусі. Першую ў 2015 годзе атрымала пісьменніца Святлана Алексіевіч.
Сама ідэя ўручаць прэстыжныя ўзнагароды за сусветныя дасягненні ў розных сферах і галінах належала шведскаму вынаходніку і філантропу Альфрэду Нобелю, які яшчэ ў 1895 годзе завяшчаў большую частку свайго фінансавага капіталу на гэтыя мэты.
Згодна з запаветам Альфрэда Нобеля, адна з ўзнагарод — прэмія міру — прысуджаецца асобе ці арганізацыі, «якая найбольш і найлепш за усіх папрацавала для ўмацавання братэрства паміж народамі, для таго, каб распусціць ці скараціць дзейныя арміі, альбо таму, хто спрыяў правядзенню мірных перамоваў».
Акрамя яе, ёсць таксама прэміі па медыцыне, фізіцы, хіміі, літаратуры і эканамічных навуках.
«Наша Нiва» — бастыён беларушчыны
ПАДТРЫМАЦЬЧытайце таксама:
Хто фінансуе кантору, якая вылучыла «Наш дом» на Нобелеўскую прэмію міру? Шукаем канцы
Нобелеўскі фонд адклікаў запрашэнне паслам Беларусі, Расіі і Ірана на ўрачыстасці
Каментары
https://dck8xvlq18iei.cloudfront.net/327417