Некаторых беларусаў арыштоўваюць проста пры падачы на польскія візы — Wyborcza
Паводле крыніц польскай газеты, ужо вядома некалькі выпадкаў, калі сілавікі бралі людзей у візавых цэнтрах.
Газета Wyborcza са спасылкай на сваю крыніцу днямі паведаміла, што ў Беларусі некаторых просьбітаў польскіх віз арыштоўвалі супрацоўнікі Камітэта дзяржаўнай бяспекі. Па яе інфармацыі, адбывалася гэта беспасярэдне ў візавых цэнтрах.
«Некаторых беларусаў, якія ўдзельнічалі ў пратэстах і потым спрабавалі з'ехаць у Польшчу, у візавых цэнтрах чакала пастка.
Здаралася так, што людзі прыходзілі па гатовыя візы і дакументы, і іх адразу затрымлівалі супрацоўнікі КДБ. Замест Польшчы гэтыя людзі ехалі ў турму», — заявіла крыніца польскай газеты Wyborcza на ўмовах ананімнасці.
Па каментар наконт гэтай тэмы выданне звярнулася да беларускага абʼяднання былых сілавікоў «Белпол».
Польскіх журналістаў цікавіла, ці замяшаная ў гэтых затрыманнях індыйская кампанія-пасярэднік VFS Global, якая ў 2021 годзе пасля значнага скарачэння ў Беларусі дыпламатычнай прысутнасці Польшчы атрымала фактычную манаполію на выдачу польскіх віз беларусам.
«Супрацоўніцтва VFS Global з беларускім рэжымам не выключана. У Беларусі цяпер дзейнічае «лічбавае гестапа». Праз структуры рэжыму праходзяць усе даныя карыстальнікаў і іх магчымых ворагаў, а кожная кампанія павінна па любым запыце спецслужб дзяліцца поўным наборам інфармацыі пра сваіх кліентаў. Таму на любога, хто падае дакументы на візы, у тым ліку і польскія, звяртаюць увагу», — распавяла каманда «Белпол» журналістам газеты Wyborcza.
Выданне адзначае, што VFS Global даўно сутыкаецца з падазрэннямі наконт свайго супрацоўніцтва са спецслужбамі аўтарытарных краін, асабліва Беларусі.
Кампанія, па інфармацыі многіх буйных польскіх медыя, таксама замяшаная ў нядаўнім «візавым скандале» ў Польшчы, калі выкрылася яе роля ў маштабных махінацыях некаторых польскіх чыноўнікаў па прыцягненні ў краіну працоўных мігрантаў з Блізкага Усходу і Азіі.
Ані кампанія VFS Global, ані МЗС Польшчы на запыты Wyborcza пракаментаваць сітуацыю з затрыманнямі просьбітаў віз у Беларусі не адказалі.
Яшчэ па тэме атрымання польскіх віз у Беларусі:
Беларусы расказваюць, як польскія консульствы адмаўляюць ім у візах
Апытанне: 45% беларусаў, якія з'ехалі ў Польшчу, плануюць там застацца
Ці адбярэ Польшча гуманітарную візу або гуманітарны ДНЖ, калі чалавек паедзе ў Беларусь?
МЗС Польшчы не будзе разрываць дамову з візавым агенцтвам у Беларусі
Змяніліся правілы падачы дакументаў на польскі шэнген: цяпер іх трэба падаваць па месцы рэгістрацыі
Каментары