Асобныя маркі цыгарэт падаражэюць у Беларусі з першага дня 2024 года, вынікае з інфармацыі, размешчанай на сайце Міністэрства падаткаў і збораў Рэспублікі.
Падаражэнне будзе вельмі істотным, паколькі з 1 студзеня павышаюцца акцызныя стаўкі на тытунёвыя вырабы. Гэта прадугледжвае новая рэдакцыя Падатковага кодэкса, якая ўступае ў сілу з 1 студзеня 2024 года.
Цыгарэты марак «Мінск», «Магнат», «Фэст», «Прэм'ер», Dove, Credo, NZ, Portal, Rigins, якія выпускаюцца на фабрыцы «Нёман», падаражэюць на 30-40 капеек. Некаторыя віды Pall Mall, Rothmans гэтага ж вытворцы вырастуць у цане на 30 капеек.
Цыгарэты, якія вырабляюцца на фабрыцы «Тытунь-Інвест», падымуцца ў цане на 15-30 капеек. Больш за ўсё падаражэюць такія брэнды, як Kalipso, MAC, Lucky Strike. «Карона» розных відаў стане даражэйшай на 15-25 капеек, «Форт» — на 25, Richmond — на 15-20 капеек, Camel — на 5.
Кампанія «Інтэр Табака» сярод іншага павысіць кошт марак Dove, Red Bor на 40-45 капеек.
«Беларусьгандаль» падыме цэны на некаторыя віды імпартаваных у Беларусь цыгарэт Rothmans на 30 капеек, а таксама на Chapman — «плюс» 20 капеек.
Акрамя таго, у студзені ў продажы з'явіцца новая марка — ESSE. Адзін пачак будзе каштаваць 6,8-6,9 рубля.
Каментары