Беларуская прапаганда сцвярджае, што траціна літоўцаў жыве ў беднасці. Але іх «беднасць» — наш сярэдні заробак
Прыкладна траціна насельніцтва Літвы ці ўжо за рысай беднасці, ці балансуе на мяжы прорвы, піша аўтар артыкула ў «СБ. Беларусь сегодня».
Літоўская галеча па версіі лукашэнкаўскай прапаганды
Аўтар СБ запэўнівае чытачоў, што эканамічная сітуацыя ў Літве кепская і будзе толькі пагаршацца.
У якасці доказаў ён спасылаецца на колькасць людзей, якія жывуць па-за рысай беднасці ці набліжаюцца да яе.
Але што ўяўляе сабой «рыса беднасці» ў Літве?
Рыса абсалютнай беднасці ў Літве ў мінулым годзе складала 354 еўра на аднаго чалавека. Гэта каля 1235 беларускіх рублёў па цяперашнім курсе. Людзей, якія недацягваюць да яе — 187 тысяч чалавек, або 6,5% насельніцтва.
Пад рызыкай беднасці ў Літве знаходзяцца тыя, хто мае 510 еўра ў месяц на аднаго жыхара ці 1071 еўра на сям'ю.
У пераводзе на нашя грошы атрымліваецца каля 1780 рублёў на адну асобу і каля 3740 рублёў на сям'ю. У гэтай групе каля 21% жыхароў краіны.
«Статыстыка глядзіцца страшнавата — прыкладна траціна насельніцтва рэспублікі ці ўжо за рысай беднасці, або балансуе на мяжы прорвы», — піша аўтар.
А што з беднасцю ў Беларусі?
Згодна з афіцыйнымі лічбамі, за рысай беднасці ў Беларусі сапраўды жыве меншы працэнт насельніцтва, чым у Літве — усяго 3,5% насельніцтва.
Каб трапіць за рысу беднасці ў Беларусі па методыцы Белстата, месячны даход чалавека мусіць складаць менш за 418 рублёў (каля 120 еўра).
Атрымліваецца, што рыса беднасці ў Беларусі і Літве адрозніваецца амаль у тры разы.
А што будзе, калі падлікі робіць не Белстат?
Аднак калі вызначаць рысу беднасці не па методыцы Белстата.
Паводле методыкі Сусветнага банка, пад рысай беднасці ў Беларусі разумеюць тых, у каго месячны ўзровень даходаў на чалавека меншы за $205,5 (гэта каля 660 рублёў або 185 еўра). Калі абапірацца на гэту метадалогію, доля жыхароў Беларусі, якія знаходзяцца за рысай беднасці, складае 27% насельніцтва.
Кпіны прапагандыстаў з Беларусі ў бок Літвы выглядаюць цалкам недарэчнымі. Пры гэтым жаданне параўноўваць эканамічныя паказчыкі Беларусі з Літвой маюць права на існаванне.
Абедзве краіны трыццаць пяць гадоў таму былі ў складзе СССР і пасля яго распаду знаходзіліся ў падобных умовах. Але Літва выбрала еўрапейскі шлях развіцця і ўжо 20 гадоў з'яўляецца членам Еўрасаюза. Беларусь жа абрала іншы шлях і прывязалася да Расіі.
У выніку гэта грамадзяне Беларусі масава ездзяць на заробкі ў Літву, а не наадварот.
Сачыце за лічбамі
Сярэдняя зарплата ў Літве па дадзеных за чацвёрты квартал 2023 года складала 1304 еўра на рукі. У Беларусі ўжо падлічылі заробкі за сакавік 2024 года. Атрымалася 1859 рублёў чыстымі, альбо 529 еўра.
Такім чынам, чалавек з сярэднім беларускім заробкам ледзь-ледзь перавышае літоўскую зоны рызыкі беднасці.
Распавядаючы пра галечу ў Літве, аўтар «СБ» тлумачыць, што ў Літве ўсё дрэнна з вытворчасцю, праз што краіна губляе працоўныя месцы, а людзі застаюцца без працы, таму і папаўняюць спісы бедных.
Але статыстыка паказвае адваротнае. Днямі стала вядома, што ў першым квартале 2024 года ў Літве была самая вялікая колькасць работнікаў за апошнія 25 гадоў — на рынку з'явілася 40 000 новых работнікаў.
Цяпер чытаюць
Якая логіка судоў за Гаюн? Мужчына, якога затрымлівалі па гэтай справе, апісаў убачанае28
Каментары
Татальная эміграцыя насельніцтва, катастрафічная нястача працоўных, няма лекараў, людажэрныя законы, алсутнасць праў і законаў. Шмат хто бяжыць адсюль. Краіна па ісце рэгіён рашкі.
Што хоча давесці калгасная прапаганда?
Гэтага трызнення ніхто не чытае. Навошта НН калупацца ў гэтай калгаснай памыйніцы?