Стала вядома афіцыйная прычына смерці Макея, Ашурка і Тарайкоўскага
Базы даных «Кіберпартызан» папоўніліся інфармацыяй пра памерлых у Рэспубліцы Беларусь да 2024 года з афіцыйнымі прычынамі смерці. Пра гэта аб'яднанне паведаміла ў сваім тэлеграм-канале.
«Такім чынам, даныя па-ранейшаму выцякаюць, а рэжым не ў стане гэта прадухіліць», — канстатуюць «Кіберпартызаны».
Таксама яны абяцалі неўзабаве апублікаваць некаторую статыстыку па смяротнасці і нараджальнасці ў Беларусі.
У якасці прыкладаў той інфармацыі, якую ўдалося здабыць, «Кіберпартызаны» змяшчаюць некалькі скрыншотаў з базы, датычнай вядомых асоб, якія пайшлі з жыцця ў апошнія гады. Смерці гэтых асоб мелі вялікі грамадскі рэзананс, а іх абставіны не да канца зразумелыя.
Адносна былога міністра замежных спраў Уладзіміра Макея і былога міністра транспарту і камунікацый Аляксея Аўраменкі прычына смерці пазначаная як «іншыя недакладна пазначаныя і неўдакладненыя прычыны смерці». Адносна абодвух у «Нашай Нівы» была інфармацыя, што яны скончылі жыццё самагубствам.
Тая самая прычына пазначаная і для памерлага ў зняволенні палітвязня Вітольда Ашурка.
Што тычыцца загінулых падчас пратэстаў 2020 года Генадзя Шутава і Аляксандра Тарайкоўскага, то прычынай смерці першага пазначаная «ачаговая траўма галаўнога мозга», а другога — «адкрытая рана пярэдняй сценкі грудной клеткі».
Урэшце, «Кіберпартызаны» змяшчаюць таксама скрыншоты, датычныя двух загінулых 28 верасня 2021 года ў выніку ўварвання сілавікоў у кватэру айцішніка Андрэя Зельцара — самога Зельцара і кадэбэшніка Дзмітрыя Федасюка.
Прычына смерці Андрэя Зельцара — «адкрытая рана пярэдняй сценкі грудной клеткі», Дзмітрыя Федасюка — «іншыя ўдакладненыя траўмы з уключэннем некалькіх абласцей цела».
Цяпер чытаюць
У базе сілавікоў «БЕСпарадкі» больш за 100 тысяч чалавек20
У базе сілавікоў «БЕСпарадкі» больш за 100 тысяч чалавек
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3939
Каментары