Установа працавала амаль два гады. Уладальнікі бара распавялі Most пра прычыны закрыцця і далейшыя планы.
«Карабель застаўся без штурвала і ветразяў»
Паводле слоў Аляксея Навуменкі, уладальніка бара, прычына закрыцця «простая і банальная» — каманда стамілася і маральна, і фізічна.
— Мы нарабілі мноства памылак. Падчас шторму наш карабель застаўся без штурвала і ветразяў. У пэўны момант мы засталіся без менеджменту, і толькі дзякуючы камандзе працягвалі плыць, — распавёў Аляксей.
Бізнэсовец адзначае, што канцэпцыя, з якой яны выходзілі на польскі рынак, перастала быць актуальнай. Рашэнне аб завяршэнні праекта далося ўладальнікам цяжка.
— Мы ўкладалі сілы, душу і эмоцыі ў бар на працягу двух гадоў, працавалі па 250 і больш гадзін у месяц. Але прыйшоў час рухацца далей, — дадае беларус.
Наведаць установу можна будзе да 4 мая. Запланаваныя мерапрыемствы адмяняць не будуць. Уладальнікі хочуць сустрэцца з гасцямі і «даць фінальны акорд».
— У нас ужо ёсць некалькі ідэй, якія нам цікава рэалізаваць у будучыні. Маючы досвед на гэтым рынку, думаем, што будзе прасцей. Але мы больш не будзем залятаць у праекты чыста дзеля фану — гэта абышлося нам дорага, — рэзюмуе прадпрымальнік.
Аляксей дадае, што калі сярод беларусаў знойдуцца зацікаўленыя ў памяшканні пад гастранамічны бізнес, каманда BackDoor з радасцю перадасць арэнду.
Чым вядомы BackDoor
Гісторыя BackDoor пачыналася ў Мінску — установа працавала на вуліцы Кастрычніцкай. У 2023 годзе ўладальнікі пераехалі ў Польшчу. Правы на мінскую ўстанову прададзены, а ў Варшаве з’явіўся аднайменны бар. Афіцыйнае адкрыццё BackDoor адбылося ў траўні 2023 года.
У польскай сталіцы BackDoor знаходзіцца па адрасе Chmielna 7/9 і спецыялізуецца на бургерах, у тым ліку вегетарыянскіх. Таксама ў меню — фры, начас, а ў алкагольнай карце — крафтавае піва і алкагольныя кактэйлі.
Перыядычна ў бары праходзілі канцэрты з удзелам беларускіх і ўкраінскіх музыкаў, а таксама вечары стэндапу і трансляцыі футбольных матчаў.
У лістападзе 2023 года паміж уласнікамі адбыўся канфлікт. Тады адзін з уладальнікаў, былы палітвязень Лявон Халатран, заявіў пра выхад з праекта.
Цяпер чытаюць
«Муж забраў у закладнікі маіх котак». Дызайнерка Вольга Кардаш — пра развод з мужам, уласную краму і самага стылёвага беларуса1
Каментары