З-за вялікіх выходных сітуацыя на беларуска-польскай мяжы застаецца напружанай. Расказваем, колькі часу ідзе на перасячэнне мяжы на аўто і аўтобусе.
90 гадзін на аўто
Па стане на 16 гадзін панядзелка, выезду з Беларусі ў Польшчу ў адзіным дзейным пасажырскім пункце пропуску «Брэст — Тарэспаль» чакаюць 1680 легкавых аўто і 95 аўтобусаў.
Чалавек, які сёння каля 15-й гадзіны перасек беларуска-польскую мяжу на легкавым аўто, расказаў, што ад моманту рэгістрацыі ў чарзе да заезду на пункт пропуску з беларускага боку прайшло 86 гадзін. З улікам праходжання мяжы атрымалася больш за 90 гадзін.
Атрымліваецца, што 28 красавіка мяжу перасякаюць тыя, хто заняў чаргу 24-25 красавіка.
А вось у зваротным кірунку чаргі цяпер наадварот няма.
Тыя, хто сёння днём вяртаўся з Польшчы ў Беларусь, перасякалі абедзве мяжы за 1,5-2 гадзіны.
Аўтобусам толькі з перасадкамі
Падарожніца, якая выехала з Гродна ў нядзелю а 22-й вечара, у Польшчу трапіла толькі а 14:30 панядзелка. І гэта дзякуючы таму, што па прыездзе на мяжу яна са свайго аўтобуса, які быў сотым у чарзе, перасела ў трэці. Заплаціла за гэта 50 даляраў.
У падарожніка з Мінска шлях да Польшчы заняў на гадзіну больш. Схема такая самая. Аўтобус быў 97-м у чарзе, але чалавеку атрымалася перасесці ў трэці ад шлагбаўма.
Агулам, па назіраннях людзей, на праходжанне самой мяжы аўтобусам сыходзіць па 12-15 гадзін.
На зваротным шляху чаргі з аўтобусаў таксама няма.
Ракіроўка кіроўцаў
Некаторыя падзяліліся цікавым назіраннем, што польскія кіроўцы аўтобусаў у пікавыя дні не хочуць ехаць у Беларусь, таму мяняюцца з беларускімі кіроўцамі.
Схема працуе так: польскі кіроўца едзе да Тарэспаля, дзе чакае, пакуль граніцу перасячэ аўтобус, які едзе з Беларусі. Беларус перасаджваецца ў аўтобус, які едзе ў Беларусь, а паляк сядае за стырно аўтобуса, якіе едзе далей у Польшчу.
Робяць яны гэта дзеля таго, каб потым па некалькі дзён не сядзець у чарзе на выезд з Беларусі ў Польшчу. Дзякуючы такой схеме, абодва кіроўцы хутчэй вяртаюцца дадому.
Што на балтыйскім кірунку?
На літоўскім кірунку напружанасць пачала спадаць. Калі а поўначы 28 красавіка выезду з Беларусі ў Літву ў «Беняконях» чакалі каля 100 легкавых машын, то пасля абеду чарга зменшылася да 30 машын.
А вось у «Каменным Лозе» ўвесь дзень сітуацыя застаецца стабільнай. Цягам ночы і дня ў чарзе стаіць каля 70 легкавых машын.
Чаргі з аўтобусаў на выезд з Беларусі ў Літву няма ў абодвух пунктах пропуску.
На латвійскім кірунку з ночы 28 красавіка чаргі няма, як з аўтобусаў, так і з легкавікоў.
Цяпер чытаюць
У кадр зноў трапіла, якім памерам шрыфта для Лукашэнкі друкуюць выступы, каб ён бачыў12
Каментары
Лучше уж отпуск в другое время взять и не тратить по несколько суток на границе