Расія нарошчвае вытворчасць «шахедаў» і неўзабаве зможа запусціць 2000 за адну ноч

Як піша Business Insider, генерал-маёр Крысціян Фройдынг з Міністэрства абароны Германіі заявіў, што Крэмль актыўна нарошчвае магутнасці для вытворчасці беспілотнікаў «Шахед». Паводле яго слоў, мэта — «адначасовы запуск 2000 беспілотнікаў», і супраць гэтага патрэбныя разумныя і эканамічна эфектыўныя сродкі супрацьдзеяння.

Расія з пачатку 2023 года наладзіла мясцовую вытворчасць гэтых дронаў у Елабузе, а некаторыя кампаненты паступаюць з Кітая. Спадарожнікавыя здымкі паказваюць, што плошча вытворчасці павялічылася ўдвая з 2023 года. Ваенная разведка Украіны таксама зафіксавала на асобных дэталях збітых дронаў маркіроўкі з Іжэўска — верагодна, гаворка пра яшчэ адну вытворчую лінію.

Амерыканскі інстытут вывучэння вайны (ISW) у сваю чаргу нядаўна паведаміў, што Расія пастаянна павялічвае колькасць «шахедаў» і беспілотнікаў-падманак (без выбухоўкі), якія яна запускае за адну ноч. У чэрвені і ліпені рост склаў 31% у параўнанні з папярэднім месяцам. У пачатку ліпеня за адну ноч была запушчана іх рэкордная колькасць — 728 штук.

Камандзір украінскіх Сіл беспілотных сістэм Роберт «Мадзяр» Броўдзі папярэдзіў, што хутка Расія можа запускаць 1000 і болей дронаў штодня.

У сваю чаргу аналітыкі ISW адзначаюць, што Расія зможа дасягнуць мэты — запускаць да 2000 дронаў за ноч — ужо да лістапада 2025 года. Аднак яны лічаць, што падтрымліваць такі тэмп пастаянна будзе немагчыма.

Тым не менш, такая магутнасць будзе рэзкім скачком у параўнанні з восенню 2024 года, калі Расія запускала па Украіне каля 2000 беспілотнікаў штомесяц.

У сувязі з ростам маштабаў нападаў Кіеў і яго саюзнікі баяцца, што супрацьпаветраная абарона Украіны можа не вытрымаць ціску. Сёння абарона грунтуецца на шматслаёвай сістэме: зенітныя ракеты, паветраны перахоп, мабільныя агнявыя групы з кулямётамі і айчынныя беспілотнікі-перахопнікі, такія як «Стынг».

Нямецкі генерал Фройдынг адзначыў, што супраць такой колькасці шахедаў нельга спадзявацца на дарагія заходнія сродкі перахопу, такія як Patriot. Патрэбныя значна таннейшыя рашэнні, коштам 2—4 тысячы еўра за адзінку. Для параўнання, адна сістэма Patriot каштуе ўраду ЗША 1,1 мільярда даляраў, а адна з яе ракет можа каштаваць каля 4 мільёнаў даляраў.

Аднак сістэмы Patriot неабходны для знішчэння балістычных ракет, якія Расія часта запускае разам з «шахедамі».

Украіна перыядычна спрабавала нанесці ўдары па Елабузе з дапамогай сваіх беспілотнікаў далёкага радыусу дзеяння, але незразумела, ці атрымалі заводы якія-небудзь значныя пашкоджанні.

• 0
• 0
• 0
• 0
• 1
• 1
• 2
• 0