Пункты пропуску «Меднікі» і «Салечнікі» былі закрытыя вечарам у пятніцу пасля таго, як былі зафіксаваныя метэазонды кантрабандыстаў з Беларусі.
Літва закрыла два пункты пропуску «Меднікі» (з беларускага боку «Каменны Лог») і «Салечнікі» («Беняконі») учора ў 21:40 да 12:00 суботы.
Таксама ўчора вечарам была спынена праца аэрапортаў у Вільні і Коўне.
У абодвух аэрапортах з-за метэазондаў былі адкліканыя, адкладзеныя або не прынятыя 40 рэйсаў. Гэта закранула больш чым 6000 пасажыраў. 10 рэйсаў адклікалі, 14 накіравалі ў іншыя аэрапорты, 16 адклалі. Самалёты накіроўваліся ў Палангу, куды адправілі і аўтобусы па пасажыраў.
Кіраўнік Нацыянальнага крызіснага цэнтра Вільмантас Віткаускас сказаў у інтэрв’ю радыё LRT, што на гэты раз шароў прыляцела прыкладна ў 2—3 разы менш, чым гэта было на пачатку тыдня.
Па яго словах, у паветры было зафіксавана тры, а ўвогуле заўважана чатыры паветраныя шары. «Аднак учора вечарам і на працягу ўсёй ночы хваляванне выклікала тое, што напрамкі, у якіх ляталі паветраныя шары, былі вельмі небяспечнымі — былі закрануты не толькі аэрапорт Вільні, але і аэрапорт Коўна», — сказаў Віткаўскас.
Ён падкрэсліў, што ўлады не разглядалі магчымасці збіваць гэтыя метэазонды. Гэта небяспечны спосаб, які прадстаўляў бы яшчэ большую рызыку для жыхароў, будынкаў і інфраструктуры.
На гэтым тыдні, увечары аўторка, ужо закрываўся аэрапорт Вільні з-за зондаў, а на ноч на сераду два пункты пропуску.
Улады Літвы тады казалі, што разглядаюць магчымасць цалкам закрыць мяжу ў выніку паўтарэння інцыдэнту.
Зараз па стане на 12:00 у «Каменным Логу» знаходзіцца 90 легкавых аўтамабіляў і 15 аўтобусаў, у «Беняконях» — 80 легкавікоў. У абодвух пунктах пропуску — 1590 грузавых аўтамабіляў.
Каментары