Новы графік БЧ скасоўвае два цягнікі ў Віцебскай вобласці. Без чыгункі застануцца і некаторыя райцэнтры
У канцы года Беларуская чыгунка традыцыйна ўводзіць новы графік руху цягнікоў. І ў цяперашнім «абнаўленні» пасажыраў чакаюць сюрпрызы. Пра адмену цягніка з Ліды на Беняконі, якая пакідае без чыгуначнага транспарту сярод іншага райцэнтр Воранава, ужо пісалася. Але выглядае, што пад скарачэнне трапілі і іншыя рэгіянальныя рэйсы, і яшчэ некалькі райцэнтраў цяпер застануцца без чыгуначнага руху. Blizko.by вывучыў, дзе і што «парэзалі».
Гродна і Ліда
Выданне «Принеманские вести» публікуе паведамленне са станцыі Ліда Баранавіцкага аддзялення БЧ:
«Змяняецца маршрут руху цягніка №610/609 Гродна — Гомель — Гродна».
Цяпер гэты цягнік едзе з Гродна ў Ліду, далей у Баранавічы, Лунінец і праз Палессе ў Гомель. Вось яго маршрут.
Журналісты праверылі расклад: пачынаючы з 14 снежня маршрут змяняецца, і пасля Мастоў цягнік едзе не на паўночны ўсход, у Ліду, а на паўднёвы ўсход, у Ваўкавыск і далей у Баранавічы. Ад Гродна да Мастоў і ад Баранавічаў да Гомеля далейшы расклад супадае з цяперашнім.
Таксама паведамляецца, што з'явяцца бесперасадачныя вагоны Гродна — Мінск — Гомель, якія ідуць праз Ліду і Маладзечна. Мяркуючы па ўсім, яны будуць чапляцца да цягніка №634 Гродна — Камунары. Такім чынам, з Гомеля ў Гродна можна будзе выехаць з розніцай у паўгадзіны і па розных маршрутах: праз Баранавічы і Лунінец альбо праз Ліду і Мінск (і прыязджаць з розніцай у 40 хвілін).
Мёры і Друя
На чыгуначных форумах заўважылі, што адмяняецца прычапны вагон да Друі (літаральна на мяжы з Латвіяй). Цяпер гэта такі вагон, які перапрычапляюць некалькі разоў, пакуль ён не дабярэцца да канчатковага пункта.
Спачатку вагон Мінск — Друя едзе ў складзе цягніка №625 Мінск — Віцебск. У Крулеўшчыне яго перачэпліваюць да цягніка № 619 Крулеўшчына — Лынтупы, а ў Варапаеве фармуюць у самастойны цягнік №617 Варапаева — Друя.
Глядзім на карту (назвы некаторых прыпынкаў тут састарэлыя, але вузлавыя станцыі засталіся тымі ж).
Гэты цягнік няпроста знайсці ў раскладзе на сайце БЧ: калі па звычцы задаць дні курсіравання «ўсе дні», то сістэма можа паказаць, што такіх цягнікоў няма зусім: так, ад Мінска да Друі і ад Крулеўшчыны да Друі яны паказваюцца, а ад Варапаева — не. Загадка чыгуначнай дзіркі!
Але варта пазначыць канкрэтную дату (а ходзіць цягнік глыбокай ноччу па суботах і нядзелях) — то цягнік магічным чынам з'яўляецца.
Дык вось, пасля 13 снежня гэты цягнік цалкам знікае з раскладу: апошняе адпраўленне з Мінска ў пятніцу 12-га, з Крулеўшчыны і Варапаева — у суботу 13-га. І потым — усё: не знайсці месцаў ні ад Мінска, ні ад Крулеўшчыны, ні ад Варапаева.
Верагодна, усялякі чыгуначны рух знікне на 89‑кіламетровым участку ад Варапаева на поўнач са станцыямі і прыпынкамі Гута, Шаркаўшчына, Мёры, Ідолта і Друя.
Такім чынам без чыгункі застаюцца адразу два райцэнтры — Мёры і Шаркаўшчына.
Лынтупы і Паставы
Нарэшце, яшчэ адна «аптымізацыя». На чыгуначным форуме паведамляюць, што прычапнога вагона ад Лынтуп да Віцебска таксама больш не будзе.
Цяпер гэты маршрут працуе так: тут ходзіць пасажырскі цягнік №620 Лынтупы — Крулеўшчына па пятніцах, суботах, нядзелях і панядзелках — той самы, да якога ў Варапаеве прычапляюць і вагоны з Друі на Мінск. І вось у складзе цягніка ёсць вагон, які ў Крулеўшчыне перачапляюць да цягніка Мінск — Віцебск, так што можна без перасадак з'ехаць з Лынтуп і Пастаў проста ў абласны цэнтр.
Але пасля 13 снежня і гэты прамы бесперасадачны вагон адмяняецца.
Больш за тое, сайт БЧ паказвае, што і цягнікі Лынтупы — Крулеўшчына таксама цалкам знікаюць з раскладу пасля 13 снежня.
Цяпер, мяркуючы па ўсім, да закрытых участкаў дададуцца яшчэ два.
У вёску на Гродзеншчыне больш не ходзіць дызель. Рэакцыя чыноўнікаў дабіла жыхароў
«У лісце чыгункі ні слова праўды». Хлопца з інваліднасцю па зроку высадзілі з цягніка, хоць у яго бясплатны праезд
У Віцебску хочуць прадаць праз аўкцыён частку чыгуначнага вакзала
Цягнікі на Маладзечна зноў пачнуць хадзіць з Мінска-Пасажырскага
Каментары