ДАІ папярэдзіла, што праз УНС кіроўцы ў Мінску два дні не будуць мець спакою
Дзяржаўтаінспекцыя папярэдзіла жыхароў Мінска пра магчымыя кароткачасовыя абмежаванні руху 18 і 19 снежня. Яны звязаныя з правядзеннем у гэтыя даты Усебеларускага народнага сходу.
Паводле інфармацыі ДАІ, на цэнтральных вуліцах і праспектах сталіцы магчымыя часовыя затрымкі ў руху транспарту. Гэта абумоўлена перамяшчэннем арганізаваных калон у суправаджэнні аўтамабіляў ДАІ, якія гарантуюць бяспечную дастаўку дэлегатаў на аўтобусах. У інспекцыі адзначылі, што маршруты руху пастараліся спланаваць так, каб мінімізаваць заторы.
Таксама паведамляецца, што пад узмоцнены кантроль возьмуць МКАД, асноўныя гарадскія магістралі і прылеглыя да іх вуліцы.
Акрамя таго, МУС прыняло пастанову ўзмацніць меры бяспекі ва ўсім Мінску. Міністр унутраных спраў Іван Кубракоў распарадзіўся арганізаваць кругласутачную ахову, залучыць сапёраў і групы маніторынгу інтэрнэту.
Каментары