Бондарава і ўсе астатнія. Топ-20 беларусаў, пра якіх у 2025 годзе чыталі ў беларускай Вікіпедыі
Першае месца рэйтынгу можа здзівіць.
Прарасійская актывістка Вольга Бондарава стала самай папулярнай асобай сярод беларусаў у беларускамоўнай «Вікіпедыі» ў 2025 годзе.
Біяграфічны артыкул пра даносчыцу сабраў 7281 прагляд за год, сцвярджаецца ў даследаванні «Лічбавы барометр Беларусі».
Верагодна, такая цікавасць да артыкула пра Бондараву звязана ў тым ліку з тым, што ў рускамоўнай «Вікіпедыі» яе біяграфіі няма. Даносчыца абышла нават Аляксандра Лукашэнку: ён тут на другім месцы з паказчыкам 6306 праглядаў. Замыкае тройку лідараў міністр інфармацыі Марат Маркаў — у яго 3403 прагляды.
У пяцёрку трапілі таксама палітзняволены журналіст Анджэй Пачобут — яго старонку адкрывалі 2895 разоў — і палітолаг Роза Турарбекава, у якой 2506 праглядаў.
Патрыярх беларускага руху Зянон Пазняк ідзе шостым (1805), яму ў спіну дыхае прапагандыст Ігар Тур (1880). Святлана Ціханоўская на восьмым месцы з вынікам 1871. У канцы дзясяткі нобелеўская лаўрэатка Святлана Алексіевіч (1713) і заснавальнік «Белага легіёна» Сяргей Бульба (1701).
У другой дзясятцы — журналіст Аляксандр Івулін, палітык і палітзняволены Мікола Статкевіч, нобелеўскі лаўрэат і праваабаронца Алесь Бяляцкі, пісьменнік Уладзімір Някляеў, палітык і блогер Сяргей Ціханоўскі, тэнісістка Арына Сабаленка, прапагандыстка Людміла Гладкая, прэм’ер-міністр Аляксандр Турчын і драматург Мікалай Халезін. Замыкае топ-20 прапагандыст Андрэй Мукавозчык.
Аўтары даследавання аналізавалі даныя старонак «Вікіпедыі» з дапамогай рэсурсу Pageviews Analysis. Яны падкрэсліваюць, што даныя пра наведвальнасць старонак адлюстроўваюць толькі ўзровень інфармацыйнай цікавасці, а не сімпатыі ці антыпатыі аўдыторыі. Высокія паказчыкі праглядаў могуць быць выкліканы як падтрымкай дзейнасці персоны, так і рэзкім непрыняццем або раптоўнай цікавасцю, справакаванай яе актыўнасцю ў публічным полі.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?18
Каментары
Усё трапна, ворага трэба знаць у твар!