Што вядома пра затрыманых радыёаматараў, якім пагражае аж да расстрэлу
Затрыманых радыёаматараў абвінавачваюць у шпіянажы і здрадзе дзяржаве. Вядомыя імёны трох з сямі арыштаваных. Хто гэтыя людзі?
Першаму з паказаных затрыманых, Мікіту Красько, 35 гадоў. Мужчына раней працаваў кур'ерам, займаўся продажам тэхнікі. Апошнім вядомым месцам яго працы была будаўнічая сфера.
Хобі Мікіты — гэта радыёсувязь і тэхналогіі ў прынцыпе. У сацсетках ён дзяліўся фотаздымкамі з падарожжаў. Цікавіцца спартыўнымі аўтамабілямі і роварамі.
Ягоны радыёпазыўны — EW1AEH.
Пра другога затрыманага, Андрэя Рэпеція, вядома няшмат. Яму каля 50 гадоў, мінчук. Пасля школы служыў у вайсковай часці №14356 па рамонце радыёлакацыйнай і артылерыйскай зброі.
Ягоны колішні радыёпазыўны — EW1ABT. Мяркуючы па старых дыскусіях, ён любіць тэхніку і аўто, пісаў пра сувязное абсталяванне і электроніку. Андрэй раней быў актыўны на розных форумах радыёаматараў. Вядома, што даволі нядаўна ён працаваў кур'ерам у прыватнай кампаніі, якая прадавала запчасткі для аўто.
Вячаслаў Бянько — 41‑гадовы мінчук. У відэа яго не паказваюць, а толькі цытуюць ягоныя словы.
З 2005 да 2018 года ён меў ІП. Пасля гэтага рэарганізаваў яго ў іншую форму гаспадарання. Мяркуючы з усяго, дзейнасць Бянько звязаная з тэхнікай.
Бянько ўвогуле аматар тэхнікі. У сацсетках і чатах ён шмат пісаў пра яе: электракары (у яго самога — BYD Song Plus Champion Edition), смартфоны, а таксама тэмы, звязаныя з радыёсувяззю і электронікай. Ён любіць фатаграфаваць, выбірацца на прыроду і падарожнічаць. Ягоны радыёпазыўны — EW1ACE.
У Вячаслава жонка і двое малых дзяцей, а таксама сабака, з якім ён любіць шпацыраваць у парку. З дзецьмі яны разам любяць падарожнічаць на роварах.
Пра што сам сюжэт?
Сюжэт пра «радыёаматараў-шпіёнаў» з'явіўся ў эфіры СТБ 15 студзеня 2026 года. У ім вядоўца Раман Пратасевіч расказвае, што пад выглядам суполак радыёаматараў нібыта дзейнічала структура перахопу сакрэтнай інфармацыі.
Некаторым арыштаваным інкрымінуюць шпіянаж (артыкул 358 Крымінальнага кодэкса) і здраду дзяржаве (артыкул 356). Апошняе прадугледжвае пакаранне аж да расстрэлу.
У сюжэце СТБ маніторынг даступных у эфіры частот трактуецца як «выцягванне дзяржаўных сакрэтаў» і замах на бяспеку Лукашэнкі. Публікацыя запісаў у інтэрнэце падаецца як «перадача інфармацыйнага суверэнітэту» ў чужыя рукі. Пры гэтым сувязь людзей у сюжэце з замежнымі выведкамі ніяк не даказваецца.
Заяўляецца аб ліквідацыі «буйной сеткі» з больш як 50 чалавек. Удакладняецца, што арыштаваных сямёра.
Раней 24 снежня 2025 года старшыня КДБ Іван Церцель заявіў пра ліквідацыю «сеткі», якая праслухоўвала пілотаў.
Нібыта ставіліся тэхнічныя сродкі, што дазвалялі праслухоўваць перамовы пілотаў як цывільнай, так і вайсковай авіяцыі. Таксама, сцвярджаў Церцель, вёўся маніторынг вакол рэжымных аб’ектаў.
«Наша Нiва» — бастыён беларушчыны
ПАДТРЫМАЦЬАд прыватнікаў патрабуюць завесці ідэолага ў штаце — распыталі, што робяць кампаніі18
Каментары
Частоты вядомыя, шыфрамі яны не карыстаюцца. Гэтым шмат хто балуецца. Карыснай выведнікам інфармацыі там няшмат.