Беларускія хірургі правялі першую аперацыю пры дапамозе кітайскага робата
У Мінскім навукова-практычным цэнтры хірургіі, транспланталогіі і гематалогіі ўпершыню правялі аперацыю з выкарыстаннем робата-хірурга кітайскай вытворчасці Medbot. Пра гэта паведамілі ў Міністэрстве аховы здароўя.
Першай пацыенткай стала жанчына з захворваннямі жоўцевага пузыра і печані. Аперацыю выканаў дырэктар цэнтра Алег Румо, яму асіставаў загадчык аддзялення транспланталогіі і гепатабіліярнай хірургіі Сяргей Караткоў.
Каб асвоіць працу з новым абсталяваннем, некалькі брыгад беларускіх спецыялістаў прайшлі стажыроўку ў Кітаі. За першай аперацыяй таксама назіралі прадстаўнікі кітайскай кампаніі Shanghai MicroPort Medbot і пасольства КНР. Акрамя таго, у цэнтры было падпісана пагадненне аб супрацоўніцтве з кітайскімі партнёрамі ў сферы рабатызаванай хірургіі.
Рабатызаваны комплекс Medbot стаў першым такім апаратам у сістэме ўстаноў аховы здароўя Мінздрава Беларусі. Яго аператыўную пастаўку з Кітая арганізавала прадпрыемства «Белмедтэхніка».
Раней Алег Румо адзначаў, што гэты робат з’яўляецца адным з самых сучасных у свеце. Яго набыў сам цэнтр за ўласныя сродкі — кошт складае некалькі мільёнаў даляраў. Падобныя сістэмы ўжо паспяхова выкарыстоўваюцца ў вядучых клініках для анкалагічных аперацый, у тым ліку на печані і падстраўнікавай залозе.
Цяпер чытаюць
Новыя дэталі знікнення Анатоля Котава. Яхта з ім змяніла курс на Абхазію, дзе яго вывелі супрацоўнікі ФСБ. Але выкраданне ці інсцэніроўка?1
Каментары