Цяпер будуць адключаць пракат самакатаў падчас дрэннага надвор’я
Сезон электрасамакатаў у Мінску стартуе 15 сакавіка. На вуліцах з’явіцца больш за 15 тысяч электрасамакатаў і ровараў.
Пра тое, якія змены чакаюць карыстальнікаў, абмеркавалі на сустрэчы з прадстаўнікамі кікшэрынгавых кампаній у Мінгарвыканкаме 11 сакавіка, пішуць Мінск-навіны.
Першым абмеркавалі пытанне размяшчэння парковак.
Было адзначана, што карыстальнікі не заўсёды пакідалі самакаты і ровары ў спецыяльна пазначаных месцах, што стварала цяжкасці для навакольных. Цяпер кікшэрынгавыя кампаніі павінны самі стварыць абавязковыя зоны паркоўкі, завяршыць паездку па-за межамі якіх будзе немагчыма.
— Такія пункты варта размяшчаць у зручных месцах. Аднак іх размяшчэнне павінна быць рассяроджаным і скаардынаваным, каб пешаходам было камфортна перамяшчацца, — адзначыў намеснік начальніка ДАІ Мінгарвыканкама Дзяніс Лівановіч. — У прыватнасці, важна выключыць сітуацыі, калі ў адным самым папулярным месцы знаходзіцца шмат электрасамакатаў, якія перашкаджаюць руху.
Што датычыцца прыпынкаў каля ўваходаў у Мінскі метрапалітэн: паркоўка ў радыусе 50 м ад іх забаронена, і ў гэтым сезоне кантроль за выкананнем гэтага правіла будзе больш строгім.
Актуальным застаецца і пытанне рэгулявання сумесных паездак на адным самакаце. Калі раней некаторыя кампаніі маглі выносіць парушальнікам папярэджанні, то цяпер правілы будуць аднолькавымі для ўсіх.
— У выпадках, калі будзе зафіксавана паездка ў тандэме, вы павінны будзеце заблакаваць гэтага карыстальніка да канца сезона, — падкрэсліла намесніца старшыні камітэта эканомікі Мінгарвыканкама Вольга Лявошка.
Яшчэ адным новаўвядзеннем стане адключэнне магчымасці пракату самакатаў падчас дрэннага надвор’я.
Паступалі прапановы і ад кікшэрынгавых кампаній. Так, прадстаўнікі адной з іх выказалі гатоўнасць выдзеліць сродкі на нанясенне і рэстаўрацыю разметкі веладарожак. Таксама ў гэтым сезоне плануецца ўнесці змены ў дзеючае рашэнне Мінгарвыканкама, якое рэгулюе правілы паркоўкі арандаваных СПМ. Адпаведны праект ужо падрыхтаваны.
Зараз у Мінску забаронена пакідаць электрасамакаты на тэрыторыі ўстаноў адукацыі, паркаў і сквераў, станцый метро, культурных аб’ектаў і зон масавых мерапрыемстваў.
Каментары