Беларус у Варшаве некалькі дзён пільнаваў злодзея, які скраў яго навушнікі. І ўрэшце вярнуў сваё — у касцёле
З дапамогай функцыі прайгравання гуку ён здолеў вызначыць патрэбны пад’езд і нават кватэру ў доме — навушнікі адгукаліся на яго сігнал.
Незвычайная гісторыя адбылася з беларусам Уладзімірам у Варшаве: ён некалькі дзён самастойна адсочваў чалавека, які завалодаў яго бесправаднымі навушнікамі, спрабаваў дамовіцца, выклікаў паліцыю — і ўрэшце атрымаў рэч назад у даволі нечаканым месцы.
Пра сваю гісторыю мужчына расказаў у сацсетках.
Паводле яго слоў, гаворка пра бесправадныя навушнікі Pixel Buds Pro 2. Калі Уладзімір зразумеў, што яны зніклі, скарыстаўся функцыяй адсочвання праз Google — і ўбачыў канкрэтную лакацыю ў Варшаве, дзе прылада актывавалася.
Ён адправіў паведамленне на навушнікі з просьбай звязацца і абяцаннем узнагароды, але адказу не атрымаў. Тады пачаў назіраць за перамяшчэннем прылады і ў выніку паехаў да дома, дзе навушнікі знаходзіліся.
На месцы ён некалькі дзён спрабаваў высветліць, у якой менавіта кватэры знаходзіцца яго рэч. З дапамогай функцыі прайгравання гуку здолеў вызначыць патрэбны пад’езд і нават дзверы — навушнікі адгукнуліся на яго сігнал.
Мужчына спрабаваў дамовіцца з чалавекам па той бок дзвярэй, прапаноўваў грошы, але безвынікова. Пасля выклікаў паліцыю, аднак тая нічога зрабіць не змагла — дзверы не адчынілі, а падстаў для прымусовых дзеянняў не было.
На трэці дзень гісторыя прыняла нечаканы паварот. Праз адсочванне беларус убачыў, што яго навушнікі перамясціліся ў цэнтр горада — і канкрэтна ў касцёл святога Аляксандра.
Уладзімір паехаў туды і, зайшоўшы ўнутр, зноў уключыў сігнал. Гук, узмоцнены акустыкай храма, пачуўся з-за алтара. Як высветлілася, нехта пакінуў навушнікі каля месца для ахвяраванняў, пасля чаго служка аднёс іх за алтар.
У выніку рэч вярнулі ўладальніку.
Сам герой гісторыі лічыць, што гэта быў «мікс тэхналогій, настойлівасці і псіхалогіі». На яго думку, чалавек, які забраў навушнікі, хутчэй за ўсё, не быў прафесійным злодзеем, а ўрэшце адчуў віну і вырашыў вярнуць знаходку — прычым сімвалічным чынам.
Ён таксама раіць заўсёды прывязваць прылады да акаўнтаў і выкарыстоўваць функцыі адсочвання — у гэтай гісторыі яны адыгралі ключавую ролю.
Каментары
Я не призываю к правонарушениям, но этот совет забудьте и выбросьте из мозга, эти функции могут сыграть злую шутку, если вдруг у вас появятся терки с законом, с супругами и тд, всякое бывает, а от сумы и до тюрьмы,как говорится...И вас легко вычислят, по смартфону тоже вычислят, поэтому "если вдруг" появились неприятности вас изобличающие немедленно избавляйтесь от телефона ,симки и подобных девайсов, топите ,не жалейте , свобода дороже !