З пачатку года сярэдні аб’ём адгрузак расійскай сыравой нафты склаў 3,46 млн бараляў у дзень — гэта прыкладна на 120 тысяч бараляў больш, чым у 2025 годзе, і больш, чым сярэднегадовыя паказчыкі за 2022—2024 гады, піша Bloomberg са спасылкай на даныя па танкерных перавозках.
Рост аб’ёмаў экспарту, на думку агенцтва, звязаны з украінскімі атакамі на расійскія НПЗ. У канцы мая Reuters пісаў, што амаль усе буйныя нафтаперапрацоўчыя заводы ў цэнтральнай Расіі былі вымушаныя спыніць або скараціць вытворчасць пасля ўдараў украінскіх беспілотнікаў. З-за атак на НПЗ расійскія нафтавыя кампаніі сутыкаюцца з цяжкасцямі ў перапрацоўцы сыравой нафты і больш актыўна прадаюць яе за мяжу.
Аб’ём расійскай нафты, што знаходзіцца на танкерах у моры, дасягнуў 124 млн бараляў, піша Расійская служба Радыё Свабода.
Паводле даных адсочвання танкерных перавозак, амаль уся гэтая нафта зараз знаходзіцца ў дарозе, а не проста стаіць у моры. Сярод актыўных пакупнікоў расійскіх нафтапрадуктаў — Індыя, якая ў маі павялічыла закупкі расійскай сыравой нафты на 63% у параўнанні з паказчыкамі лютага. Гэта адбылося на фоне аслаблення амерыканскіх абмежаванняў на куплю расійскай нафты.
З-за ваеннага канфлікту на Блізкім Усходзе і росту сусветных цэн на нафту Расія рэзка павялічыла свае даходы ад экспарту нафты. Калі ў пачатку 2026 года Масква зарабляла на продажы нафты каля 1—1,2 млрд даляраў у тыдзень, то да мая гэты паказчык вырас да 2—2,5 млрд даляраў у тыдзень, вынікае з падлікаў Bloomberg.
Гэта максімальныя значэнні з пачатку поўнамаштабнай вайны ва Украіне.
Цяпер чытаюць
«Не спадабаліся прадукты на паліцы — і пішуць туды эсэмэску». МУС назвала Threads пагрозай бяспецы і заявіла пра затрыманні29
«Не спадабаліся прадукты на паліцы — і пішуць туды эсэмэску». МУС назвала Threads пагрозай бяспецы і заявіла пра затрыманні
Беларус-вахтавік на Ямале стварае песні на беларускай мове з дапамогай ШІ. «Раней музыка была закрытым клубам. Нейрасеткі адчынілі гэтыя дзверы з нагі»1010
Каментары