Жыхары Слуцка ўсё часцей скардзяцца на зарастанне ракі Случ, ад якой горад атрымаў назву. У некаторых месцах плынь ужо амаль не відаць, а расчысціць рэчышча ўласнымі сіламі занадта дорага, піша BG.Мedia.
Жыхарка Слуцка апублікавала паведамленне, у якім звярнула ўвагу на стан ракі Случ у раёне вуліцы Вечаркевіча. На яе думку, вадаём паступова зарастае, а без расчысткі сітуацыя будзе толькі пагаршацца.
«Рачулка патроху ператвараецца ў балота. Узімку, калі лёд быў трывалым, мы нават самі спрабавалі крыху расчысціць, але, на маю думку, усё трэба прыбіраць разам з каранямі. Мы даведваліся, колькі будзе каштаваць зрабіць гэта сваімі сіламі хаця б на нашай вуліцы — атрымліваецца вельмі дорага. Набярэжную яшчэ крыху падтрымліваем самі. Праз зараснікі ўжо нават плыні не відаць», — расказала случчанка.
У каментарах многія адзначылі, што зарастанне Случы можна назіраць і на іншых участках.
Некаторыя пішуць, што праблема ўжо даўно выходзіць за межы аднаго раёна:
«Усім абыякава. Набярэжную пакосяць, а гэтыя лапухі проста пускаюць па плыні. За медвучылішчам там увогуле не прайсці — усё зарасло».
Іншыя звяртаюць увагу на сітуацыю ў іншай частцы Слуцка.
«У раёне Навадворцаў рака хутка ператворыцца ў ручай — таксама моцна зарасла, плыні амаль няма».
Былі і тыя, хто звязаў сітуацыю з больш шырокімі экалагічнымі працэсамі:
«Пасля меліярацыі амаль знішчылі многія рэкі, а дробныя і зусім зніклі. Цяпер трэба зноў забалочваць тэрыторыі, інакш засухі будуць толькі часцейшымі».
Гэта ўжо не першы выпадак, калі мясцовыя жыхары звяртаюць увагу на стан Случы. Раней паведамляла пра скаргі жыхароў вёскі Працавічы Слуцкага раёна на забруджванне старарэчча Случы.
Мясцовыя жыхары тады сцвярджалі, што вада ў вадаёме прыкметна пагоршылася, а праблема не вырашаецца, нягледзячы на шматлікія звароты. Каб прыцягнуць увагу да сітуацыі, яны нават запісалі відэазварот.
Праверкі Слуцкай раённай інспекцыі прыродных рэсурсаў пацвердзілі перавышэнне дапушчальных канцэнтрацый шэрагу забруджвальных рэчываў.
Асноўнай прычынай назвалі моцна зношаныя ачышчальныя збудаванні, пабудаваныя яшчэ ў 1970‑х гадах. Паводле дзяржСМІ, іх рэканструкцыю плануюць завяршыць толькі да 2029 года ў межах праграмы «Камфортнае жыллё і спрыяльнае асяроддзе».
Цяпер чытаюць
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»23
Ціханоўская: Перамены ў Беларусі — гэта пытанне часу. Вось асноўныя тэзісы яе выступу на канферэнцыі «Новая Беларусь»
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары