Вучоныя знайшлі сляды «дагістарычнай банды» ўзростам 1,4 мільёна гадоў
Вучоныя знайшлі ў Кеніі сляды ўзростам каля 1,4 мільёна гадоў, якія, верагодна, належалі групе дарослых самцоў вымерлага віду гамінінаў. На думку даследчыкаў, гэта можа сведчыць, што яны часам перасоўваліся асобнымі мужчынскімі групамі, што сведчыць пра больш складаную сацыяльную арганізацыю старажытных сваякоў чалавека, чым меркавалася раней. З падрабязнасцямі знаёміць Daily Mail.
У донных адкладах на беразе старажытнага возера Туркана ў Кеніі міжнародная група даследчыкаў знайшла 21 адбітак ступняў, якія захаваліся больш за 1,4 мільёна гадоў. На думку аўтараў даследавання, сляды былі пакінутыя ў адносна кароткі прамежак часу, калі ўздоўж берага разам прайшлі каля васьмі асобін.
Параўнанне адбіткаў з дапамогай двухмернага і трохмернага мадэлявання дазволіла звязаць іх з Paranthropus boisei — вымерлым відам гамінінаў, які жыў адначасова з Homo erectus, але належаў да асобнай галіны эвалюцыі чалавекападобных продкаў, якая пазней вымерла. Гэты від таксама вядомы пад неафіцыйнай назвай «Чалавек-шчаўкунчык» праз вельмі магутныя сківіцы і буйныя карэнныя зубы.
Памеры слядоў паказваюць, што большасць з іх маглі пакінуць дарослыя самцы. Адсутнасць у групе відавочных слядоў самак або дзяцей дазваляе выказаць навуковую гіпотэзу пра існаванне нават у такі старажытны час спецыфічных формаў сацыяльнай арганізацыі.
На думку антраполагаў, гэта сведчыць пра здольнасць самцоў да ўзаемнай талерантнасці. Нягледзячы на канкурэнцыю за рэсурсы і партнёрак, яны маглі аб’ядноўвацца ў сумесныя групы для абароны ад драпежнікаў або больш эфектыўнага пошуку ежы ў небяспечным навакольным асяроддзі.
Гэтая знаходка таксама ўнесла істотныя карэктывы ў біялагічны партрэт віду. Раней лічылася, што Paranthropus boisei былі значна меншымі за сваіх сучаснікаў — людзей віду Homo erectus. Аднак памеры знойдзеных адбіткаў сведчаць пра адваротнае.
Навукоўцы вызначылі, што некаторыя асобіны дасягалі росту 1,8 метра і вагі каля 75 кілаграмаў. Такія параметры набліжаюць іх да памераў сучаснага чалавека і патрабуюць перагляду многіх аспектаў біялогіі і паводзін гэтага віду.
Даследчыкі таксама мяркуюць, што Paranthropus boisei мог рэгулярна вяртацца да берагоў возера, багатага на харчовыя рэсурсы. У той час у гэтай мясцовасці рос папірус і іншыя водныя расліны, а таксама сустракаліся малюскі і іншыя водныя арганізмы, якія маглі быць часткай рацыёну. Шматразовыя візіты розных груп на гэтыя берагі на працягу дзясяткаў тысяч гадоў, зафіксаваныя ў розных геалагічных пластах, робяць рэгіён Турканы сапраўдным летапісам чалавечай эвалюцыі.
Аўтары плануюць працягнуць раскопкі, спадзеючыся знайсці новыя сляды, якія дапамогуць больш дакладна аднавіць лад жыцця гамінінаў, што насялялі рэгіён каля паўтара мільёна гадоў таму.
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары
Падобна, што сучасныя людзі, якія любяць праводзіць час на пляжы ды лазіць у вадаём, а таксама рыбакі, набылі сабе гэтае жарстнае хоббі не выпадкова, а праз наяўнасьць у іх нейкага генетычнага коду, які атрымалі ў спадчыну ад тых надзвычай далёкіх сваякоў. Не ?