19 vieraśnia ŭ Biełarusi adkryvajucca vučeńni ADKB, a 20 vieraśnia — «Zachad-2013»
Rasijskija desantniki vysadzilisia ŭ Mačuliščach pad Minskam.
20–25 vieraśnia ŭ Biełarusi projduć płanavyja sumiesnyja vučeńni z Kalektyŭnymi siłami apieratyŭnaha reahavańnia (KSAR) Arhanizacyi Damovy ab kalektyŭnaj biaśpiecy (ADKB) «Uzajemadziejańnie-2013». Budzie adpracoŭvacca prymianieńnie voinskich kantynhientaŭ KSAR va Uschodniejeŭrapiejskim rehijonie.
Adkryćcio vučeńniaŭ adbudziecca 19 vieraśnia. U hety ž dzień projduć apieratyŭny zbor kamandavańnia KSAR i kamandna-štabnaja treniroŭka.
Jak paviedamiła pres-słužba Ministerstva abarony Biełarusi, ahulnaja kolkaść udzielnikaŭ vučeńniaŭ z Armienii, Biełarusi, Kazachstana, Kyrhyzstana, Rasii i Tadžykistana składaje bolš za 600 čałaviek, u tym liku padraździaleńni 31-j desantna-šturmavoj bryhady PDV Rasii z Uljanaŭska, 37-j desantna-šturmavoj bryhady śpiecyjalnaha pryznačeńnia aeramabilnych vojskaŭ Kazachstana (Tałdykarhan) i 103-j mabilnaj bryhady sa składu Sił śpiecyjalnych apieracyj Biełarusi (Viciebsk).
Metaj vučeńniaŭ źjaŭlajecca ŭdaskanaleńnie padrychtoŭki orhanaŭ kiravańnia i vojskaŭ. Płanujecca daśledavać mahčymyja šlachi dalejšaha raźvićcia kampanientaŭ vojskaŭ (kalektyŭnych sił) ADKB, paradku ich aptymalnaha funkcyjanavańnia.
Asablivaściami vučeńniaŭ stanuć adnačasovaje sumiesnaje ŭžyvańnie dvuch składnikaŭ sistemy kalektyŭnaj biaśpieki ADKB — rehijanalnaj hrupoŭki vojskaŭ Biełarusi i Rasii i Kalektyŭnych sił apieratyŭnaha reahavańnia ADKB, u tym liku prymianieńnie avijacyi kalektyŭnych sił u śpiecyjalnaj i sumiesnaj apieracyi. U suviazi z hetym «Uzajemadziejańnie- 2013» adbudziecca na fonie adpracoŭki zadač sumiesnych stratehičnych rasijska-biełaruskich vučeńniaŭ «Zachad- 2013» , jakija pačnucca zaŭtra i projduć z 20 pa 26 vieraśnia na palihonie pad Hrodnam.
U asnovu zadumy vučeńniaŭ pakładzieny adzin z varyjantaŭ raźvićcia vajenna-palityčnaj abstanoŭki ŭ vypadku praniknieńnia na terytoryju ŭmoŭnaha dziaržavy ADKB «ekstremisckich hrup, jakija staviać svajoj metaj praviadzieńnie terarystyčnych aktaŭ i destabilizacyju abstanoŭki ŭ krainie».
Vučeńni projduć u try etapy. Upieršyniu na vučeńniach KSAR ADKB budzie adpracoŭvacca desantavańnie parašutnym sposabam samachodnych artyleryjskich ustanovak. Vajskoŭcy z krain ADKB prybyli ŭ palavy łahier i na palihon la Babrujska i Asipovičaŭ.
Tym časam vučeńni «Zachad-2013» vyklikali zaniepakojenaść jeŭrapiejskich krain, bo na ich, jak i na papiarednich anałahičnych vučeńniach, adpracoŭvajucca scenary vajennych dziejańniaŭ na miažy Polščy j Litvy.
Alaksandr Łukašenka pryznavaŭ, što biełaruskaja i rasijskaja armii ŭjaŭlajuć saboj praktyčna adzinaje cełaje. Biełaruskaja apazicyja krytykuje ŭłady za niesamastojnuju palityku ŭ halinie nacyjanalnaj biaśpieki. Choć asnoŭnyja pahrozy nacyjanalnaj niezaležnaści i samastojnaści sychodziać ad Rasii, siłavyja struktury krainy zastajucca ŭ poli ŭpłyvu toj samaj Rasii, u tym liku i praz takija voś vučeńni.
Kamientary