Małady rabotnik «Minsk-Areny» pavinien zapłacić 71 miljon dalaraŭ
26‑hadovy minčuk Alaksiej Łosieŭ maje ŭsie šansy stać samym maładym biełaruskim multymiljanieram, jaki ŭsiaho dabiŭsia sam. Praŭda, jość niuansy. Niezvyčajnaja biznes-historyja razhortvajecca ŭ stalicy.
Alaksiej Łosieŭ — źniešnie ničym nie admietny małady minčuk. Naradziŭsia ŭ prostaj siamji. Baćka, praŭda, z sudzimaściami, ale ź im chłopiec i nie ros. Vychoŭvaŭsia mamaj. Skončyŭ škołu, zajmaŭsia viesłavańniem, navat mieŭ bronzavy miedal čempijanatu Minska ŭ svaim uzroście.
Amal adrazu paśla zakančeńnia škoły pačaŭ pracavać u «Minsk-Arenie» instruktaram. Paralelna, u 2020-m, adkryŭ IP.
U kancy 2023 hoda Łosieŭ zarehistravaŭ svaju pieršuju kampaniju. TAA «Prajm Dystrybjušn» zajmajecca anłajn-prodažam kitajskich vejpaŭ — zavoziła ich nievialikimi partyjami, afarmlała siertyfikaty. Na piku ŭ Łosieva aficyjna pracavali šeść čałaviek.
Ale roŭna praz dva hady niešta pajšło nie tak — «Prajm Dystrybjušn» pajšła ŭ bankructva praz zajavu padatkovaj Centralnaha rajona Minska. Da Łosieva vystaŭlenyja patrabavańni bolš čym na 160 miljonaŭ rubloŭ!
Pry hetym streści ź jaho ŭdałosia tolki kala 800 tysiač rubloŭ u vyhladzie, jak možna mierkavać, vejpaŭ.
Na hetym pryhody Łosieva nie skončylisia. Litaralna na dniach u bankructva pajšła jašče adna jaho kampanija, TAA «Vejp Ekspart», adkrytaja ŭ siaredzinie 2025-ha. Znoŭ pa zajavie MNS Centralnaha rajona Minska. Hetym razam suma naličanaj zapazyčanaści — bolš za 43 miljony rubloŭ.
Kali ŭ sumie, to małady minčuk, pa mierkavańni padatkovaj, niedapłaciŭ kala 205 miljonaŭ rubloŭ (hety $71 miljon u ekvivalencie). Kali ŭjavić, što hetyja hrošy realna byli niaspłačanyja, a nie źjaŭlajucca vynikam kreatyŭnych naličeńniaŭ padatkovaj, jakaja zamiest prybytkaŭ, naprykład, vyrašyła naličyć padatak z usiaho abarotu, to Alaksieja možna było b upeŭniena ličyć samym maładym biełaruskim multymiljanieram.
Praŭda što, pa materyjałach apošniaha suda, brać z Łosieva niama čaho, a sam jon na sudovyja pasiadžeńni nie chodzić. Pry hetym chłopiec nie za kratami, jon znachodzicca ŭ anłajnie ŭ sacsietkach.
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki3
Kamientary
A tak, pacan išoŭ da pośpiechu. Ale nie tam - vejpy zabivajuć zdaroŭje moładzi, i nie tak - nabraŭ, vidać kredytaŭ na avoś-nieboś. Nu dy i voś...
Ci druhi varyjant - farmalny kiraŭnik sietki kampanij, što najbolš imavierna, darečy.