U Estonii vybuchnuŭ skandał praz rekłamu smažanaha miasa. U joj uhledzieli varožaść da ruskamoŭnych
Estonski vytvorca miasnoj pradukcyi Rannarootsi Lihatööstus apynuŭsia ŭ centry hramadskaha skandału paśla publikacyi rekłamnaha dopisu ŭ Facebook. Na vyjavie dvoje mužčyn z ukrainskimi ściažkami na rukavach smažać miasa na hryli na fonie hustych kłuboŭ dymu. Rekłamu supravadžaŭ słohan: «Pravilny hryl robić horkuju cybulu sałodkaj», piša err.ee.
Častka karystalnikaŭ sacyjalnych sietak uspryniała takuju rekłamu jak adsyłku da vajny va Ukrainie i prajavu movy varožaści.
Asablivuju krytyku vyklikała słova sibul («cybula»), bo ŭ razmoŭnaj estonskaj movie jano časam užyvajecca jak źnievažalnaja mianuška ŭ dačynieńni da ruskamoŭnych žycharoŭ krainy.
Vykanaŭčy dyrektar i člen praŭleńnia kampanii Karma Aksiel zajaviŭ, što aŭtary rekłamy nie ŭkładali ŭ jaje nijakaha palityčnaha abo varožaha sensu. Pavodle jaho słoŭ, słohan byŭ źviazany vyklučna z pradukcyjaj kampanii, u skład jakoj uvachodzić karamielizavanaja cybula.
Kiraŭnik pryznaŭ, što pra niehatyŭnaje značeńnie słova sibul daviedaŭsia tolki paśla taho, jak vakoł rekłamy ŭźnik skandał. Jon padkreśliŭ, što kampanija nie staviła pierad saboj mety pravakavać kanflikt.
Tłumačačy vybar vizualnaha afarmleńnia, Aksiel adznačyŭ, što hustyja słupy dymu na zadnim płanie byli naviejanyja sučasnaj navinavaj stužkaj, u jakoj štodnia pakazvajuć kadry z vojnaŭ i kanfliktaŭ. Pavodle jaho, heta pavinna było adlustravać siońniašniuju rečaisnaść, a nie być pasłańniem suprać jakoj-niebudź krainy abo naroda.
U kampanii taksama padkreślili, što publikacyja nie była skiravanaja suprać jakoj-niebudź nacyjanalnaj hrupy, jakaja žyvie ŭ Estonii. Pa słovach kiraŭnictva, tekst adnosiŭsia da praduktu, a vyjava adlustroŭvała sučasny infarmacyjny fon.
Razam z tym Karma Aksiel pryznaŭ, što rekłama nie pieradała toj sens, jaki ŭ jaje ŭkładvali aŭtary. Jon adznačyŭ, što, vidać, udałuju rekłamu treba było zrabić inakš, bo mnohija ludzi zrazumieli jaje nie tak, jak zadumvałasia.
Niahledziačy na krytyku ŭ internecie i zakliki bajkatavać pradukcyju, kampanija pakul nie płanuje vydalać sprečny dopis. Na dumku kiraŭnika, ciapier publikacyja ŭžo «žyvie svaim žyćciom», a jaje vydaleńnie nie maje asablivaha sensu.
U Rannarootsi paviedamili, što rekłamnuju kampaniju raspracoŭvaŭ markietynhavy adździeł, adnak atrymać kamientar ad jaho kiraŭnika nie ŭdałosia, bo jon znachodzicca ŭ adpačynku.
Rannarootsi Lihatööstus — adzin z najbujniejšych vytvorcaŭ miasnoj pradukcyi ŭ Estonii. Kampanija vypuskaje kaŭbasy, viandlinu, biekon, miasa dla hrylu i inšyja vyraby. Vytvorčaść raźmieščanaja ŭ paviecie Laeniemaa, a pradukcyja pradajecca ŭ handlovych sietkach pa ŭsioj krainie.
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč33
Kamientary
A chto liča, što nijakaj "varožaści" nie było i heta supadzieńnie?)